దేశీయ స్టాక్‌ మార్కెట్లు బుధవారం లాభాలతో ముగిశాయి. రోజంతా తీవ్ర ఒడుదొడుకులకు లోనైన సూచీలు.. చివర్లో కొనుగోళ్ల మద్దతుతో పుంజుకున్నాయి. దీంతో వరుసగా ఐదో సెషన్‌లోనూ లాభాలు నమోదయ్యాయి. బీఎస్‌ఈ సెన్సెక్స్‌ 383.55 పాయింట్లు (0.50 శాతం) పెరిగి 77,301.40 వద్ద స్థిరపడింది. ఎన్‌ఎస్‌ఈ నిఫ్టీ 149.75 పాయింట్లు (0.63 శాతం) లాభపడి 23,960.60 వద్ద ముగిసింది. దీంతో నిఫ్టీ 24 వేల మార్కుకు చేరువైంది.

ఉదయం లాభాలతో ప్రారంభమైన సూచీలు.. కొద్దిసేపటికే ఒత్తిడికి లోనై నష్టాల్లోకి జారుకున్నాయి. సెన్సెక్స్‌ ఓ దశలో 76,604.85 కనిష్ఠ స్థాయిని తాకింది. అక్కడి నుంచి కోలుకుని 77,396.04 గరిష్ఠ స్థాయికి చేరింది. నిఫ్టీ కూడా 23,696.15 కనిష్ఠ స్థాయి నుంచి పుంజుకుని 23,960.60 వద్ద ట్రేడింగ్‌ ముగించింది. బ్యాంకింగ్‌, ఆటో, మెటల్‌, మీడియా రంగాల షేర్లలో కొనుగోళ్లు సూచీలకు అండగా నిలిచాయి.

సెన్సెక్స్‌ షేర్లలో భారత్‌ ఎలక్ట్రానిక్స్‌ (బీఈఎల్‌) 4.56 శాతం లాభంతో అగ్రస్థానంలో నిలిచింది. టైటాన్‌ 4.28 శాతం, ఇండిగో 2.39 శాతం, బజాజ్‌ ఫైనాన్స్‌ 2.38 శాతం, ఐటీసీ 2.32 శాతం చొప్పున పెరిగాయి. అదానీ పోర్ట్స్‌, బజాజ్‌ ఫిన్‌సర్వ్‌, టాటా స్టీల్‌, మహీంద్రా అండ్‌ మహీంద్రా, హెచ్‌డీఎఫ్‌సీ బ్యాంక్‌ షేర్లలోనూ కొనుగోళ్లు కనిపించాయి.

మరోవైపు ఐటీ షేర్లు మార్కెట్‌ లాభాలకు కొంతమేర అడ్డుకట్ట వేశాయి. టీసీఎస్‌ 2.70 శాతం నష్టంతో సెన్సెక్స్‌లో అత్యధికంగా పడిపోయింది. హెచ్‌సీఎల్‌ టెక్నాలజీస్‌ 2.23 శాతం, ఇన్ఫోసిస్‌ 1.65 శాతం చొప్పున నష్టపోయాయి. ఎటర్నల్‌, కోటక్‌ మహీంద్రా బ్యాంక్‌, ఏషియన్‌ పెయింట్స్‌ షేర్లు కూడా నష్టాల్లో ముగిశాయి.

రంగాల వారీగా చూస్తే నిఫ్టీ మీడియా సూచీ 5.15 శాతం లాభంతో అగ్రస్థానంలో నిలిచింది. మెటల్‌ 2.80 శాతం, రియల్టీ 2.85 శాతం, కన్జ్యూమర్‌ డ్యూరబుల్స్‌ 2.04 శాతం, ఎఫ్‌ఎంసీజీ 1.50 శాతం చొప్పున పెరిగాయి. ఆటో, ఫైనాన్షియల్‌ సర్వీసెస్‌, ప్రభుత్వ రంగ బ్యాంకులు, ఫార్మా సూచీలు కూడా లాభపడ్డాయి. అయితే నిఫ్టీ ఐటీ 1.50 శాతం క్షీణించింది.

విస్తృత మార్కెట్లలోనూ కొనుగోళ్ల జోరు కనిపించింది. నిఫ్టీ స్మాల్‌క్యాప్‌ 100 సూచీ 2 శాతం, మిడ్‌క్యాప్‌ 100 సూచీ 1.55 శాతం పెరిగాయి. మార్కెట్‌ ఒడుదొడుకులను సూచించే ఇండియా విక్స్‌ 2.83 శాతం తగ్గి 15.28కి చేరింది. అంతర్జాతీయ మార్కెట్లో ముడి చమురు ధరలు స్వల్పంగా తగ్గాయి. డబ్ల్యూటీఐ క్రూడ్‌ బ్యారెల్‌ 95.95 డాలర్ల వద్ద, బ్రెంట్‌ క్రూడ్‌ 102.84 డాలర్ల వద్ద ట్రేడయ్యాయి.