ఎన్నికల అక్రమాలకు సూత్రధారి నారా లోకేశ్: రవీంద్రనాథ్‌ రెడ్డి

రాష్ట్రంలో జరిగిన మున్సిపల్ ఎన్నికలు ప్రజాస్వామ్యబద్ధంగా జరగలేదని, అవి నకిలీ ఎన్నికలను తలపించాయని వైసీపీ జిల్లా అధ్యక్షుడు, మాజీ ఎమ్మెల్యే రవీంద్రనాథ్‌ రెడ్డి విమర్శించారు. అధికార బలాన్ని, పోలీసులను అడ్డుపెట్టుకుని టీడీపీ ఎన్నికల ఫలితాలను తారుమారు చేసిందని ఆయన ఆరోపించారు. కడపలో ఏర్పాటు చేసిన మీడియా సమావేశంలో ఆయన ఈ వ్యాఖ్యలు చేశారు.

"టీడీపీ నాయకులు ముందుగానే ఇంటింటికీ తిరిగి ప్రజల అభిప్రాయాలను తెలుసుకున్నారు. తమకు ఓట్లు పడే పరిస్థితి లేదని గుర్తించడంతో, ముందస్తు ప్రణాళిక ప్రకారం రాష్ట్రవ్యాప్తంగా ఎన్నికల అక్రమాలకు తెరలేపారు. ఈ అక్రమాలన్నింటికీ నారా లోకేశ్ కారణం. కరకట్ట నుంచి ఆయన ప్లాన్ చేశారు" అని రవీంద్రనాథ్‌ రెడ్డి ఆరోపించారు. ఇది ప్రజలు ఇచ్చిన తీర్పు కాదని, కేవలం అధికార బలం, పోలీసుల సహకారంతో సాధించిన ఫలితమని ఆయన స్పష్టం చేశారు.

"పోలీసు, అధికార యంత్రాంగంతో పాటు ఎన్నికల కమిషన్‌ కూడా అధికార పార్టీకి సహకరించింది. పోలీసులు, రౌడీలతో ప్రజలను భయభ్రాంతులకు గురిచేసినా ఓటర్లు స్వచ్ఛందంగా వైసీపీకి ఓట్లు వేశారు. కౌంటింగ్‌ కేంద్రంలోనూ మా అభ్యర్థులపై దాడులు జరిగాయి" అని తెలిపారు. ఎన్ని బెదిరింపులు ఎదురైనా వెనక్కి తగ్గకుండా నిలిచిన ప్రజలకు, పార్టీ శ్రేణులకు ఆయన కృతజ్ఞతలు తెలిపారు. కడప ఎప్పటికీ వైసీపీకి కంచుకోటేనని, రాష్ట్రవ్యాప్తంగా పార్టీకి ప్రజల మద్దతు ఉందని ధీమా వ్యక్తం చేశారు. ఈ సమావేశంలో మాజీ ఉప ముఖ్యమంత్రి అంజాద్‌ బాషా, మాజీ ఎమ్మెల్యే రఘురామిరెడ్డి కూడా పాల్గొన్నారు.