యూఎస్ ఎన్నికల్లో రిపబ్లికన్ల ఓటమి.. వ్యంగ్యంగా స్పందించిన ఎలాన్ మస్క్

అమెరికా మధ్యంతర ఎన్నికల్లో డెమొక్రాట్లు ఘనవిజయం సాధించడంపై టెస్లా అధినేత, ప్రపంచ కుబేరుడు ఎలాన్ మస్క్ వ్యంగ్యంగా స్పందించారు. రిపబ్లికన్ పార్టీకి వందల మిలియన్ డాలర్లు మద్దతుగా అందించినప్పటికీ ఆశించిన ఫలితాలు రాకపోవడంతో తన "ఎన్నికల్లో జోక్యం చేసుకునే స్పేస్ లేజర్లు" విఫలమయ్యాయంటూ సోషల్ మీడియా ప్లాట్‌ఫామ్ 'ఎక్స్‌'లో చురకలు అంటించారు. "ప్రస్తుతం స్పేస్‌లో డేటా సెంటర్లు చాలా ఆకర్షణీయంగా కనిపిస్తున్నాయి" అని ఆయన మరో పోస్ట్ చేయడం గమనార్హం.

యూఎస్ మధ్యంతర ఎన్నికల్లో డెమొక్రాట్లు అద్భుతమైన పనితీరు కనబరిచారు. యూఎస్ నెట్‌వర్క్‌ల అంచనాల ప్రకారం, సెనెట్‌తో పాటు ప్రతినిధుల సభలోనూ డెమొక్రాట్లు తిరిగి పట్టు సాధించారు. ఇది వాషింగ్టన్‌లో అధికార సమతుల్యతలో పెద్ద మార్పుకు సంకేతం. ముఖ్యంగా సాంప్రదాయకంగా రిపబ్లికన్ల కంచుకోటగా ఉన్న టెక్సాస్‌లోనూ డెమొక్రాట్లు గెలుపొందడం ఈ ఎన్నికల్లో కీలక పరిణామం.

ఈ నేపథ్యంలోనే టెక్సాస్ నుంచి సెనెటర్‌గా ఎన్నికైన జేమ్స్ టలారికో.. మస్క్, అధ్యక్షుడు డొనాల్డ్ ట్రంప్‌లపై తీవ్రస్థాయిలో విరుచుకుపడ్డారు. తన విజయోత్సవ సభలో ఆయన మాట్లాడుతూ.. "మేం 300 మిలియన్ డాలర్లకు పైగా ఖర్చు చేసిన ప్రచారాన్ని ఎదుర్కొన్నాం. సోషల్ మీడియా అల్గారిథమ్‌లను శాసించే బిలియనీర్లకు వ్యతిరేకంగా పోరాడాం" అని మస్క్‌ను ఉద్దేశించి విమర్శించారు. ట్రంప్ హయాంలో రాజకీయాలు ఒక క్రీడగా, ట్రోలింగ్‌గా మారాయని ఆయన ఆరోపించారు.

ఈ ఎన్నికల ప్రచారంలో రిపబ్లికన్ పార్టీకి మస్క్ అతిపెద్ద ఆర్థిక మద్దతుదారులలో ఒకరిగా నిలిచారు. ఎన్బీసీ న్యూస్ ప్రకారం.. రిపబ్లికన్ పార్టీ కాంగ్రెస్ ప్రచారాల కోసం ఆయన సుమారు 250 మిలియన్ డాలర్లు ఖర్చు చేశారు. ఇంత భారీగా ఖర్చు చేసినా రిపబ్లికన్లకు పరాజయం తప్పలేదు.

డెమొక్రాట్ల విజయం టెక్నాలజీ, కృత్రిమ మేధ (ఏఐ) భవిష్యత్తుపై కొత్త ఆందోళనలను రేకెత్తిస్తోంది. ఈ ఫలితాల ప్రభావంతో స్టాక్ ఫ్యూచర్లు పడిపోయాయి. టెక్నాలజీ, డేటా సెంటర్ రంగాలపై డెమొక్రాట్ల విధానాలు ఎలా ఉంటాయోనన్న ఆందోళన మార్కెట్ వర్గాల్లో వ్యక్తమవుతోంది. ఈ విజయంతో కాంగ్రెస్‌పై పూర్తి పట్టు సాధించిన డెమొక్రాట్లు, ట్రంప్ శాసనపరమైన అజెండాను సవాలు చేయడానికి సిద్ధమవుతున్నారు.