ఇజ్రాయెల్‌కు ట్రంప్‌ భారీ షాక్‌.. ఏటా 4 బిలియన్‌ డాలర్ల సాయం బంద్‌!

ఇజ్రాయెల్‌కు ఏటా అందించే భారీ ఆర్థిక సాయాన్ని నిలిపివేస్తామని అమెరికా అధ్యక్షుడు డొనాల్డ్‌ ట్రంప్‌ ప్రకటించారు. ఈ ఏడాది చివరి నాటికి సాయం ఆపేస్తామని వెల్లడించారు. ఇజ్రాయెల్‌ ప్రధాని బెంజమిన్‌ నెతన్యాహుతో ఈ మేరకు ఒప్పందం కుదిరిందని తెలిపారు. అయితే అవసరమైతే ఇజ్రాయెల్‌కు అండగా ఉంటామని, అమెరికా ఆయుధాల విక్రయాలు కొనసాగుతాయని స్పష్టం చేశారు. ఈ ప్రకటనతో ఇరు దేశాల మధ్య దశాబ్దాలుగా కొనసాగుతున్న రక్షణ సంబంధాలపై చర్చ మొదలైంది. 

ఏటా 4 బిలియన్‌ డాలర్ల సాయం
అమెరికా ఏటా ఇజ్రాయెల్‌కు సుమారు 4 బిలియన్‌ డాలర్ల సైనిక సాయం అందిస్తోంది. ఈ నిధులతో ఆయుధాలు, మందుగుండు సామగ్రి కొనుగోలు చేయడంతోపాటు క్షిపణి రక్షణ వ్యవస్థలను బలోపేతం చేసుకుంటోంది. అయితే ఇజ్రాయెల్‌కు ఇక ఈ సాయం అవసరం లేదని ట్రంప్‌ అభిప్రాయపడ్డారు. అమెరికా ఎన్నికల సమయంలో ఇజ్రాయెల్‌కు అందిస్తున్న సాయంపై వస్తున్న విమర్శలకు కూడా ఈ నిర్ణయం అడ్డుకట్ట వేస్తుందని వ్యాఖ్యానించారు. 

2028 వరకు ఒప్పందం.. మరి ఇప్పుడెలా?
అమెరికా, ఇజ్రాయెల్‌ మధ్య ప్రస్తుతం అమల్లో ఉన్న పదేళ్ల సైనిక సహకార ఒప్పందం ప్రకారం 2019 నుంచి 2028 వరకు మొత్తం 38 బిలియన్‌ డాలర్ల సాయం అందించాలి. ఇందులో ఏటా 3.3 బిలియన్‌ డాలర్లు సైనిక అవసరాలకు, మరో 500 మిలియన్‌ డాలర్లు క్షిపణి రక్షణ కార్యక్రమాలకు కేటాయిస్తారు. ఈ ఒప్పందం 2028 సెప్టెంబరు వరకు అమల్లో ఉంటుంది. ఈ నేపథ్యంలో ఏడాది చివరికే సాయాన్ని ఎలా నిలిపివేస్తారనే అంశంపై ట్రంప్‌ స్పష్టత ఇవ్వలేదు. 

నెతన్యాహుపై సొంత దేశంలోనే విమర్శలు
ట్రంప్‌ ప్రకటనపై ఇజ్రాయెల్‌లోనూ విమర్శలు వచ్చాయి. ఆ దేశ ప్రతిపక్ష నేత గాడి ఐసెన్‌కోట్‌ ఈ నిర్ణయాన్ని భద్రతా వ్యవస్థకు, ప్రజలకు ముందుగా తెలియజేయకపోవడంపై అభ్యంతరం వ్యక్తం చేశారు. మరోవైపు అమెరికా సాయంపై ఆధారపడటాన్ని క్రమంగా తగ్గించుకోవాలని ఇజ్రాయెల్‌ ప్రధాని నెతన్యాహు గతంలోనే సంకేతాలిచ్చారు. అయితే తాజా ప్రకటన అమలుపై, అమెరికా కాంగ్రెస్‌ ఆమోదంపై స్పష్టత రావాల్సి ఉంది.