భారత్-పాక్ మ్యాచ్: 34 వేల సీట్లకు 84 లక్షల దరఖాస్తులు.. ఇదే అసలైన క్రేజ్!

క్రికెట్ ప్రపంచంలో భారత్, పాకిస్థాన్ మ్యాచ్‌కు ఉండే క్రేజ్ ఎలాంటిదో మరోసారి రుజువైంది. 2027లో జరిగే వన్డే ప్రపంచకప్‌లో ఈ రెండు జట్ల మధ్య జరిగే గ్రూప్ స్టేజ్ మ్యాచ్‌ కోసం అభిమానులు టికెట్లకు భారీ సంఖ్యలో దరఖాస్తు చేసుకున్నారు. జొహన్నెస్‌బర్గ్‌లోని వాండరర్స్ స్టేడియంలో జరగనున్న ఈ మ్యాచ్ కోసం ఏకంగా 84 లక్షల టికెట్ దరఖాస్తులు వచ్చాయి. అయితే, ఈ స్టేడియం సీటింగ్ సామర్థ్యం కేవలం 34,000 మాత్రమే కావడం గమనార్హం.

అంతర్జాతీయ క్రికెట్ కౌన్సిల్ (ఐసీసీ) వెల్లడించిన వివరాల ప్రకారం, అక్టోబర్ 10, 2027న షెడ్యూల్ అయిన ఈ మ్యాచ్ కోసం 83.97 లక్షల దరఖాస్తులు అందాయి. ఇదే వేదికలో నవంబర్ 21న జరిగే టోర్నీ ఫైనల్ మ్యాచ్‌కు దాదాపు 79 లక్షల దరఖాస్తులు రాగా, ఇది రెండో స్థానంలో నిలిచింది. దీన్ని బట్టి ఫైనల్ కంటే కూడా భారత్-పాక్ మ్యాచ్‌కే ఎక్కువ డిమాండ్ ఉందని స్పష్టమవుతోంది.

దక్షిణాఫ్రికా, జింబాబ్వే, నమీబియా సంయుక్తంగా ఆతిథ్యమిస్తున్న 2027 ప్రపంచకప్‌ టోర్నమెంట్‌కు ప్రపంచవ్యాప్తంగా భారీ స్పందన లభిస్తోంది. మొత్తం 193 దేశాల నుంచి 12 కోట్లకు పైగా టికెట్ రిక్వెస్ట్‌లు రాగా, వీరిలో 28 లక్షల మంది ప్రత్యేకంగా రిజిస్టర్ చేసుకున్నారు. ఇందులో ఒక్క దక్షిణాఫ్రికా నుంచే 10.5 కోట్లకు పైగా దరఖాస్తులు రావడం విశేషం. 24 ఏళ్ల తర్వాత ఆఫ్రికా గడ్డపై ఈ మెగా టోర్నీ జరగనుంది. మొత్తం 14 జట్లు, 57 మ్యాచ్‌లు 12 వేదికల్లో జరగనున్నాయి.

టికెట్ల కోసం దరఖాస్తు చేసుకునేందుకు నవంబర్ 21, 2026 వరకు గడువు ఉంది. డిమాండ్ ఎక్కువగా ఉన్న మ్యాచ్‌లకు ర్యాండమ్ పద్ధతిలో (లాటరీ) విజేతలను ఎంపిక చేసి టికెట్లను కేటాయిస్తారు.