అమెరికాను టెన్షన్ పెడుతున్న చైనా 'దైవ నాగ'.. బయటకొచ్చిన హై-రిజల్యూషన్ చిత్రం

చైనా అత్యంత రహస్యంగా ప్రయోగిస్తున్న పునర్వినియోగ స్పేస్ ప్లేన్ 'షెన్లాంగ్' (దైవ నాగ)కు సంబంధించిన అత్యంత స్పష్టమైన ఫొటోను అమెరికా డిఫెన్స్ ఇంటెలిజెన్స్ ఏజెన్సీ (డీఐఏ) తొలిసారిగా విడుదల చేసింది. చైనా నుంచి ఎదురవుతున్న ముప్పుపై తాజాగా విడుదల చేసిన నివేదికలో ఈ హై-రిజల్యూషన్ చిత్రాన్ని చేర్చింది. ఇప్పటివరకు చైనా అధికారికంగా ఎలాంటి చిత్రాలను విడుదల చేయని నేపథ్యంలో, ఈ ఫొటో ప్రపంచవ్యాప్తంగా ఆసక్తిని రేకెత్తిస్తోంది.

2024లో మాక్సర్ టెక్నాలజీస్ (ప్రస్తుతం వాంటర్)కు చెందిన శాటిలైట్ సుమారు 90 కిలోమీటర్ల దూరం నుంచి ఈ చిత్రాన్ని తీసింది. ఈ ఫొటోలో షెన్లాంగ్ స్పేస్ ప్లేన్ తన సోలార్ ప్యానెళ్లను తెరుచుకుని, వెనుకవైపు ఉన్న పేలోడ్ డోర్‌తో మరో శాటిలైట్‌కు అనుసంధానమై ఉండటం స్పష్టంగా కనిపిస్తోంది. దీని పొడవు సుమారు 26 అడుగులు ఉండవచ్చని వాంటర్ సంస్థ అంచనా వేసింది. డిజైన్ పరంగా ఇది అచ్చం అమెరికాకు చెందిన బోయింగ్ నిర్మిత X-37B స్పేస్ ప్లేన్‌ను పోలి ఉందని విశ్లేషకులు చెబుతున్నారు.

గత ఆరేళ్లుగా షెన్లాంగ్ కార్యకలాపాలు నిర్వహిస్తుండగా, ప్రస్తుతం ఇది నాలుగో మిషన్‌లో ఉంది. 2026 ఫిబ్రవరి 7న లాంగ్ మార్చ్ 2ఎఫ్ రాకెట్ ద్వారా జియుక్వాన్ శాటిలైట్ లాంచ్ సెంటర్ నుంచి దీనిని ప్రయోగించారు. తన మిషన్లలో భాగంగా ఈ స్పేస్ ప్లేన్ భూమికి సమీప కక్ష్యలో గుర్తుతెలియని వస్తువులను జారవిడుస్తున్నట్లు స్వతంత్ర పరిశీలకులు గతంలోనే నివేదించారు. అంతరిక్షంలో వస్తువులను ఉంచడం, వాటిని పరీక్షించడం, తిరిగి భూమికి రాగల సామర్థ్యం ఈ నౌకకు ఉందని డీఐఏ తన నివేదికలో పేర్కొంది.

స్పేస్.కామ్ నివేదిక ప్రకారం, రాబోయే రోజుల్లో ఈ స్పేస్ ప్లేన్ అమెరికాలోని పలు నగరాల మీదుగా వెళ్లనుంది. నవంబర్ 3న డెన్వర్, నవంబర్ 5, 6 తేదీల్లో లాస్ ఏంజిల్స్ నగరాల మీదుగా తెల్లవారుజామున ప్రయాణించనుంది. ఆ సమయంలో వాతావరణం అనుకూలిస్తే దీనిని సాధారణ కంటితో చూసే అవకాశం ఉందని తెలుస్తోంది.