అనీష్, అనశ్వర రాజన్ 'ఇట్లు అర్జున'.. కొత్త రిలీజ్ డేట్ ఖరారు

యువ నటుడు అనీష్, అనశ్వర రాజన్ జంటగా నటిస్తున్న రొమాంటిక్ ఎంటర్‌టైనర్ 'ఇట్లు అర్జున' కొత్త విడుదల తేదీని చిత్ర బృందం శనివారం ప్రకటించింది. ముందుగా అక్టోబర్ 30న విడుదల చేయాలనుకున్న ఈ చిత్రాన్ని వాయిదా వేస్తున్నట్లు ప్రకటించిన మేకర్స్, తాజాగా నవంబర్ 13న ప్రపంచవ్యాప్తంగా థియేటర్లలోకి తీసుకురానున్నట్లు వెల్లడించారు. మహేశ్ ఉప్పల ఈ చిత్రంతో దర్శకుడిగా పరిచయం అవుతున్నాడు.

కొత్త విడుదల తేదీని నిర్మాణ సంస్థ వాట్ నెక్స్ట్ ఎంటర్‌టైన్‌మెంట్స్ తమ అధికారిక ఎక్స్ ఖాతా ద్వారా పంచుకుంది. "క్యాలెండర్లలో తేదీని మార్క్ చేసుకోండి. ఈ నిరీక్షణకు రెట్టింపు విలువ ఉంటుంది. కింగ్ నాగార్జున సమర్పిస్తున్న 'ఇట్లు అర్జున' నవంబర్ 13న ప్రపంచవ్యాప్తంగా గ్రాండ్‌గా విడుదలవుతోంది. థియేటర్లలో అర్జున్ ప్రేమ డబుల్ బ్యాంగ్‌తో వినిపిస్తుంది" అని పోస్ట్ చేసింది.

ఈ చిత్రానికి టాలీవుడ్ అగ్రకథానాయకుడు నాగార్జున సమర్పకుడిగా వ్యవహరించడం విశేషం. ప్రముఖ దర్శకుడు వెంకీ కుడుముల తన వాట్ నెక్స్ట్ ఎంటర్‌టైన్‌మెంట్స్ బ్యానర్‌పై ఈ చిత్రాన్ని నిర్మిస్తున్నారు. ఈ చిత్రంతో అనీష్ హీరోగా టాలీవుడ్‌కు పరిచయం అవుతున్నాడు. ఇప్పటికే విడుదలైన టైటిల్ గ్లింప్స్, రెండు పాటలు సినిమాపై భారీ అంచనాలను పెంచాయి. ముఖ్యంగా, ప్రచార చిత్రాలలో అనీష్, అనశ్వరల మధ్య కెమిస్ట్రీ ప్రేక్షకులను బాగా ఆకట్టుకుంది.

ఈ సినిమాలో కథానాయకుడు అనీష్ మూగ, చెవిటి యువకుడి పాత్రలో కనిపించనున్నట్లు ఇండస్ట్రీ వర్గాల్లో ప్రచారం జరుగుతోంది. ఇదే నిజమైతే, ఇదొక వినూత్న ప్రేమకథగా నిలిచిపోతుందని భావిస్తున్నారు. దక్షిణాదిలో అగ్ర సంగీత దర్శకుడిగా ఉన్న తమన్ ఈ చిత్రానికి సంగీతం అందిస్తున్నారు. రాజా మహాదేవ్ సినిమాటోగ్రఫీ, కోటి కె ఎడిటింగ్ బాధ్యతలు నిర్వర్తించగా, యాక్షన్ సన్నివేశాలను దిలీప్ సుబ్బరాయన్ తీర్చిదిద్దారు.