కంటిచూపు మందగించిందని ఆసుపత్రికి వెళ్లిన వృద్ధుడు.. కళ్లలో తిరుగుతున్న పురుగులు.. వైద్యుల షాక్‌!

దక్షిణ కొరియాలో వైద్యులను సైతం విస్మయానికి గురిచేసిన ఓ అరుదైన ఘటన వెలుగులోకి వచ్చింది. కొన్ని నెలలుగా కంటినొప్పి, కళ్లు ఎర్రబడటం, చూపు మందగించడం వంటి సమస్యలతో బాధపడుతున్న 71 ఏళ్ల రైతు కళ్లను పరీక్షించిన వైద్యులు షాక్‌కు గురయ్యారు. ఆయన రెండు కళ్లలోనూ మొత్తం 11 పరాన్నజీవులు బతికి ఉండి, కదులుతూ ఉండటాన్ని గుర్తించారు.

వివరాల్లోకి వెళితే.. దక్షిణ కొరియాకు చెందిన ఈ రైతు క్యాటరాక్ట్ సర్జరీ చేయించుకోవాలనే ఉద్దేశంతో కాంగ్వాన్ నేషనల్ యూనివర్సిటీ ఆసుపత్రిని సంప్రదించారు. అయితే, ఆయన సమస్యలను విన్న తర్వాత వైద్యులు కళ్లను లోతుగా పరీక్షించారు. ఈ క్రమంలో కళ్ల లోపల తెల్లగా, సన్నగా ఉన్న పురుగులు సజీవంగా తిరుగుతుండటాన్ని చూసి నివ్వెరపోయారు.

వెంటనే స్పందించిన వైద్య బృందం ప్రత్యేక పరికరాల (ఫైన్ ఫోర్సెప్స్) సహాయంతో ఆయన రెండు కళ్లలో నుంచి మొత్తం 11 పురుగులను అత్యంత జాగ్రత్తగా బయటకు తీశారు. వీటిని 'థెలాజియా కాలిపీడా' అనే పరాన్నజీవులుగా గుర్తించారు. ఈ పురుగుల పరిమాణం 11 నుంచి 22 మిల్లీమీటర్ల వరకు ఉంది. 

మరింత ఆందోళనకరమైన విషయం ఏమిటంటే.. బయటకు తీసిన వాటిలో కొన్ని ఆడ పురుగులు అప్పటికే గుడ్లు పెట్టి, లార్వాలను ఉత్పత్తి చేస్తున్న దశలో ఉన్నాయి. సరైన సమయంలో చికిత్స అందకపోయి ఉంటే, అవి కళ్లలోనే సంతానోత్పత్తి జరిపి తీవ్ర నష్టం కలిగించేవని వైద్యులు తెలిపారు.

పురుగులను తొలగించిన వెంటనే రైతు ఆరోగ్యం మెరుగుపడింది. అతనికి ఎలాంటి యాంటీ-పారాసైటిక్ మందులు అవసరం లేకుండానే కోలుకున్నాడు. రెండు నెలల పాటు పర్యవేక్షణలో ఉంచగా, సమస్య మళ్లీ తలెత్తలేదని వైద్యులు ధ్రువీకరించారు.

సాధారణంగా ఈ పురుగులు ఆసియా, యూర‌ప్‌లోని కొన్ని ప్రాంతాల్లో కుక్కలు, పిల్లుల వంటి జంతువుల కళ్లలో నివసిస్తాయి. జంతువుల కళ్లపై వాలే ఈగలు, వాటి కన్నీళ్లను తాగే క్రమంలో పురుగుల లార్వాలను గ్రహిస్తాయి. అవే ఈగలు మనుషుల కళ్లపై వాలినప్పుడు, ఈ లార్వాలు మనుషులకు సంక్రమిస్తాయి. 

ఈ అరుదైన కేసుకు సంబంధించిన వివరాలను వైద్యులు అక్టోబర్ 24న 'ది న్యూ ఇంగ్లాండ్ జర్నల్ ఆఫ్ మెడిసిన్'లో ప్రచురించారు. కారణం లేకుండా కళ్లు ఎర్రబడటం, కళ్లలో నలుసు పడినట్లు ఎక్కువ కాలం అనిపించడం వంటి లక్షణాలతో వచ్చే రోగుల విషయంలో పరాన్నజీవుల కోణంలో కూడా పరీక్షించాలని ఈ కేసు సూచిస్తోందని వారు పేర్కొన్నారు.