గూగుల్‌కు గట్టి ఎదురుదెబ్బ.. ఒక్కరోజే రూ.47ల‌క్ష‌ల కోట్లు నష్టం.. చరిత్రలోనే అతిపెద్ద పతనాల్లో ఒకటి!

టెక్ దిగ్గజం, గూగుల్ మాతృ సంస్థ అయిన 'ఆల్ఫాబెట్' మార్కెట్ విలువలో చారిత్రక నష్టాన్ని చవిచూసింది. ఆర్టిఫిషియల్ ఇంటెలిజెన్స్ (ఏఐ) టెక్నాలజీపై భారీగా ఖర్చు చేయడం, ప్రధాన ఆదాయ వనరైన సెర్చ్ అడ్వర్టైజింగ్ వృద్ధి మందగించడం వంటి కారణాలతో ఇన్వెస్టర్లు ఆందోళనకు గురయ్యారు. ఫలితంగా గురువారం ట్రేడింగ్‌లో కంపెనీ షేర్లు భారీగా పతనమయ్యాయి. ఒక్కరోజే ఆల్ఫాబెట్ మార్కెట్ విలువ నుంచి దాదాపు 500 బిలియన్ డాలర్లు (రూ.47ల‌క్ష‌ల కోట్లు) ఆవిరైపోయాయి. స్టాక్ మార్కెట్ చరిత్రలో ఒకే రోజు ఒక కంపెనీ ఇంత పెద్ద మొత్తంలో విలువను కోల్పోవడం ఇది ఒక రికార్డు.

మూడో త్రైమాసిక ఆర్థిక ఫలితాల వెల్లడి తర్వాత ఆల్ఫాబెట్ క్లాస్-ఏ షేర్లు 12.64% పతనమై 283.82 డాలర్ల వద్ద ముగిశాయి. ఈ పతనంతో కంపెనీ మార్కెట్ క్యాపిటలైజేషన్ సుమారు 499.8 బిలియన్ డాలర్లు తగ్గింది. కంపెనీ తన మూడో త్రైమాసికంలో 127.6 బిలియన్ డాలర్ల ఆదాయాన్ని ప్రకటించింది. 

ఇది గతేడాదితో పోలిస్తే 25% అధికమే అయినప్పటికీ, మార్కెట్ విశ్లేషకుల అంచనాలను అందుకోలేకపోయింది. ముఖ్యంగా కంపెనీకి ప్రధాన ఆదాయ వనరైన గూగుల్ సెర్చ్ విభాగం వృద్ధి కేవలం 12% గా నమోదైంది. గత త్రైమాసికంలో ఇది 17% గా ఉండటంతో, వృద్ధి రేటు మందగించడం ఇన్వెస్టర్లను తీవ్ర ఆందోళనకు గురిచేసింది.

మరోవైపు, ఆర్టిఫిషియల్ ఇంటెలిజెన్స్‌పై ఆల్ఫాబెట్ చేస్తున్న అపారమైన వ్యయం కూడా ఈ పతనానికి ప్రధాన కారణంగా నిలిచింది. ఈ త్రైమాసికంలోనే కంపెనీ మూలధన వ్యయాలు 51.4 బిలియన్ డాలర్లకు చేరుకున్నాయి. ఇందులో సింహభాగం డేటా సెంటర్లు, ఏఐ మౌలిక సదుపాయాల కోసమే ఖర్చు చేశారు. 

ఈ ఆర్థిక సంవత్సరంలో మొత్తం ఖర్చు 195 బిలియన్ల నుంచి 205 బిలియన్ డాలర్ల మధ్య ఉంటుందని, 2027 నాటికి ఈ వ్యయం మరింత పెరుగుతుందని కంపెనీ అంచనా వేసింది. భవిష్యత్తు కోసం చేస్తున్న ఈ భారీ పెట్టుబడులు ప్రస్తుత లాభదాయకతపై ప్రభావం చూపుతాయనే భయాలు మార్కెట్‌లో వ్యక్తమయ్యాయి.

అయితే, ఈ నిరాశజ‌న‌క‌ ఫలితాల మధ్య గూగుల్ క్లౌడ్ విభాగం ఆశాకిరణంలా నిలిచింది. ఏఐ సేవలకు డిమాండ్ పెరగడంతో క్లౌడ్ విభాగం ఆదాయం రెట్టింపు కంటే ఎక్కువగా పెరిగి 30.7 బిలియన్ డాలర్లకు చేరుకుంది. ఇది అంచనాలను మించిన వృద్ధి అయినప్పటికీ, బాహ్య కంప్యూటింగ్ సామర్థ్యంపై ఆధారపడటం వల్ల సమీప భవిష్యత్తులో క్లౌడ్ మార్జిన్‌లపై ఒత్తిడి ఉండవచ్చని కంపెనీ ఎగ్జిక్యూటివ్‌లు అంగీకరించారు. చాట్‌జీపీటీ వంటి పోటీదారులతో పాటు గూగుల్ సొంత ఏఐ ఫీచర్లు కూడా సంప్రదాయ సెర్చ్ అడ్వర్టైజింగ్ వ్యాపారాన్ని దెబ్బతీస్తున్నాయనే ఆందోళనలు ఈ ఫలితాలతో మరింత బలపడ్డాయి.