రాష్ట్రస్థాయి షూటర్ ఘాతుకం.. పట్టపగలే తండ్రీకొడుకు సహా ముగ్గురిని కాల్చి చంపేశాడు!

ఉత్తరప్రదేశ్ రాజధాని లక్నోలో అత్యంత దారుణ ఘటన చోటుచేసుకుంది. ఓ చిన్న పార్కింగ్ వివాదం ముగ్గురి ప్రాణాలను బలిగొంది. రాష్ట్రస్థాయి షూటర్ అయిన ఓ వ్యక్తి, తన పొరుగింటిలో నివసించే ఒకే కుటుంబానికి చెందిన ముగ్గురిని పట్టపగలే కాల్చి చంపాడు. ఈ ఘాతుకానికి సంబంధించిన దృశ్యాలు సోషల్ మీడియాలో వైరల్ కావడంతో తీవ్ర కలకలం రేపుతోంది.

లక్నోలోని సాదత్‌గంజ్ ప్రాంతంలోని బ్రాహ్మణి టోలాలో ఈ సంఘటన జరిగింది. అక్టోబర్ 26న ఉదయం 10:30 గంటల సమయంలో, రిటైర్డ్ ప్రభుత్వ ఉద్యోగి శివాజీ తివారీ (63), ఆయన సోదరుడు శివేంద్ర అలియాస్ శంభు (55), శివాజీ కుమారుడు సుయాశ్ (30) హత్యకు గురయ్యారు. వీరి ఇంటి పక్కనే నివసించే రిషభ్ శుక్లా అనే వ్యక్తితో పార్కింగ్ స్థలం విషయంలో కొంతకాలంగా వివాదం నడుస్తోంది.

సంఘటన జరిగిన రోజు ఉదయం తివారీ కుటుంబ సభ్యుడు ఒకరు వివాదాస్పద స్థలంలో కారు పార్క్ చేయడంతో గొడవ మళ్లీ మొదలైంది. వాగ్వివాదం తీవ్రరూపం దాల్చడంతో ఆగ్రహానికి గురైన రిషభ్ శుక్లా తన వద్ద ఉన్న పిస్టల్‌తో కాల్పులకు తెగబడ్డాడు. ఈ కాల్పుల్లో శివాజీ, శివేంద్ర, సుయాశ్‌లకు తీవ్ర గాయాలయ్యాయి. వారిని వెంటనే కింగ్ జార్జ్ మెడికల్ యూనివర్సిటీ ట్రామా సెంటర్‌కు తరలించగా, చికిత్స పొందుతూ ముగ్గురూ మరణించారు. త్వరలో వివాహం జరగాల్సి ఉండగా సుయాశ్ మృతి చెందడం వారి కుటుంబంలో తీవ్ర విషాదాన్ని నింపింది.

నిందితుడు రిషభ్ శుక్లా గతంలో మర్చంట్ నేవీలో నావిగేషన్ అధికారిగా పనిచేశాడని, రాష్ట్రస్థాయి షూటింగ్ పోటీల్లో పాల్గొని పతకాలు కూడా గెలుచుకున్నాడని పోలీసులు తెలిపారు. ఘటన జరిగిన వెంటనే అతడిని అరెస్ట్ చేసి, పిస్టల్, ఖాళీ కాట్రిడ్జ్‌లను స్వాధీనం చేసుకున్నారు.

ఈ ఘటనపై బాధితుల కుటుంబ సభ్యులు తీవ్ర ఆగ్రహం వ్యక్తం చేశారు. నిందితుడిపై గతంలో పలుమార్లు ఫిర్యాదు చేసినా పోలీసులు పట్టించుకోలేదని ఆరోపిస్తూ నిరసనకు దిగారు. దీంతో, స్థానిక ఎస్‌హెచ్‌వో సహా ఇద్దరు పోలీసు సిబ్బందిని ఉన్నతాధికారులు సస్పెండ్ చేశారు. ప్రస్తుతం సోషల్ మీడియాలో వైరల్ అవుతున్న వీడియోలలో నిందితుడు కాల్పులు జరుపుతున్న దృశ్యాలు, గాయపడిన వ్యక్తి సాయం కోసం అర్థిస్తున్న దృశ్యాలు అందులో ఉన్నాయి. ఈ వీడియోల ఆధారంగా పోలీసులు కేసు దర్యాప్తు చేస్తున్నారు.