నవంబర్‌ 1 నుంచి కీలక మార్పులు.. గ్యాస్‌ ధరలు, పెన్షన్‌, ఐటీఆర్‌ విషయంలో ఏం జరగబోతోంది?

నవంబర్‌ నెల ప్రారంభం కానుండటంతో సామాన్యులు, పెన్షనర్లు, పన్ను చెల్లింపుదారులు కొన్ని ముఖ్యమైన ఆర్థిక అంశాలపై దృష్టి పెట్టాల్సి ఉంది. నవంబర్‌ 1 నుంచి జీఎస్టీ నిబంధనల్లో మార్పులు అమల్లోకి రానుండగా, పెన్షనర్లకు లైఫ్‌ సర్టిఫికెట్‌ సమర్పణ ప్రక్రియ ప్రారంభం కానుంది. ఆడిట్‌ వర్తించే కొందరు పన్ను చెల్లింపుదారులకు ఐటీఆర్‌ దాఖలు గడువు కూడా పొడిగించారు. ఎల్‌పీజీ సిలిండర్ల ధరలపై నెలవారీ సమీక్ష జరగనుంది. 

జీఎస్టీ నిబంధనల్లో మార్పులు
నవంబర్‌ 1 నుంచి జీఎస్టీకి సంబంధించిన కొన్ని నిబంధనలు మారనున్నాయి. విక్రయం తర్వాత ఇచ్చే డిస్కౌంట్లకు సంబంధించిన నిబంధనలను సులభతరం చేయడం, ఇన్‌వర్టెడ్‌ డ్యూటీ నిర్మాణం కారణంగా రిఫండ్‌ కోసం ఎదురుచూస్తున్న వ్యాపారాలకు తాత్కాలిక రిఫండ్‌లను వేగంగా అందించడం ఈ మార్పుల ప్రధాన ఉద్దేశం. ఈ నిర్ణయాలతో వ్యాపారాలకు పన్ను సంబంధిత ప్రక్రియలు మరింత సులభమయ్యే అవకాశం ఉంది. 

పెన్షనర్లకు లైఫ్‌ సర్టిఫికెట్‌ ముఖ్యం
ప్రభుత్వ పెన్షన్‌ పొందుతున్నవారు తమ పెన్షన్‌ నిరంతరాయంగా అందాలంటే ప్రతి సంవత్సరం లైఫ్‌ సర్టిఫికెట్‌ సమర్పించాలి. 80 ఏళ్లలోపు వయసున్న అర్హులైన పెన్షనర్లు నవంబర్‌ 1 నుంచి ఈ ప్రక్రియను పూర్తి చేయవచ్చు. 80 ఏళ్లు నిండినవారికి అక్టోబర్‌ 1 నుంచే అవకాశం కల్పించారు. సాధారణంగా లైఫ్‌ సర్టిఫికెట్‌ సమర్పించేందుకు నవంబర్‌ 30 చివరి తేదీ. గడువులోగా సమర్పించకపోతే పెన్షన్‌ చెల్లింపుల్లో తాత్కాలిక అంతరాయం ఏర్పడవచ్చు. 

ఐటీఆర్‌ గడువు పొడిగింపు
2025-26 ఆర్థిక సంవత్సరానికి సంబంధించిన ఐటీఆర్‌ దాఖలులో, ఆడిట్‌ తప్పనిసరైన నిర్దిష్ట వర్గాల పన్ను చెల్లింపుదారులకు ఊరట లభించింది. అసెస్‌మెంట్‌ ఇయర్‌ 2026-27కు సంబంధించిన రిటర్నుల గడువును అక్టోబర్‌ 31 నుంచి 2026 నవంబర్‌ 21 వరకు పొడిగించారు. ఈ వెసులుబాటు అందరు పన్ను చెల్లింపుదారులకు వర్తించదు. కాబట్టి తమకు వర్తించే గడువును పన్ను చెల్లింపుదారులు నిర్ధారించుకోవాలి. 

ఎల్‌పీజీ ధరలపై ఉత్కంఠ
చమురు మార్కెటింగ్‌ సంస్థలు ప్రతి నెలా మొదటి తేదీన ఎల్‌పీజీ సిలిండర్ల ధరలను సమీక్షిస్తాయి. దీంతో నవంబర్‌ 1న గృహ అవసరాల సిలిండర్లు, వాణిజ్య సిలిండర్ల ధరల్లో మార్పులు ఉంటాయా అనే ఆసక్తి నెలకొంది. అయితే అక్టోబర్‌ 29 నాటికి నవంబర్‌ 1 ధరల మార్పుపై అధికారిక ప్రకటన వెలువడలేదు. ధరలు పెరుగుతాయా? తగ్గుతాయా? అనేది అధికారిక ప్రకటన వచ్చిన తర్వాతే స్పష్టమవుతుంది. 

వికలాంగుల పెన్షన్‌పై లేని క్లారిటీ
వికలాంగుల పెన్షన్‌ అర్హతలు, కేంద్ర సాయం పెంపునకు సంబంధించిన సంస్కరణలకు కేంద్ర మంత్రివర్గం ఆమోదం తెలిపినప్పటికీ, వాటి అమలుకు సంబంధించిన కొత్త మార్గదర్శకాలు ఇంకా విడుదల కాలేదు. అందువల్ల ఈ మార్పులు నవంబర్‌ 1 నుంచే అమల్లోకి వస్తాయని ప్రచారం జరుగుతున్నప్పటికీ ఇంకా అధికారిక ప్రకటన వెలువడలేదు. అధికారిక మార్గదర్శకాలు వచ్చే వరకు లబ్ధిదారులు వేచి చూడాల్సి ఉంటుంది.