నిశ్శబ్దంగా దెబ్బతీసే ఫ్యాటీ లివర్.. ఈ 5 అలవాట్లపై ఓ కన్నేయండి!

మద్యపానం అలవాటు లేకపోయినా, ఆరోగ్యంగా కనిపిస్తున్నా కొందరిలో ఫ్యాటీ లివర్ సమస్య బయటపడుతోంది. ముఖ్యంగా ఎలాంటి అనారోగ్య లక్షణాలు లేని యువత, సాధారణ ఆరోగ్య పరీక్షల్లో ఈ విషయాన్ని తెలుసుకుని ఆశ్చర్యపోతున్నారు. టైమ్స్ ఆఫ్ ఇండియా కథనం ప్రకారం.. ఈ సమస్య చాలా ఏళ్లపాటు నిశ్శబ్దంగా ఉండి, క్రమంగా లివర్ వాపు, మచ్చలు (సిర్రోసిస్) వంటి తీవ్రమైన వ్యాధులకు దారితీసే ప్రమాదం ఉందని వైద్య నిపుణులు హెచ్చరిస్తున్నారు. మన రోజువారీ జీవితంలోని కొన్ని సాధారణ అలవాట్లే శరీరంలో చక్కెర, కొవ్వుల నియంత్రణను దెబ్బతీసి ఈ సమస్యకు కారణమవుతున్నాయని నిపుణులు విశ్లేషిస్తున్నారు.

ప్రమాదాన్ని పెంచే ఐదు ప్రధాన అలవాట్లు:

1. రాత్రి ఆలస్యంగా తిని వెంటనే నిద్రపోవడం: రాత్రిపూట ఆలస్యంగా, అది కూడా ఎక్కువగా తినడం వల్ల శరీరంలో అదనపు కేలరీలు కొవ్వుగా మారి లివర్‌లో పేరుకుపోతాయి. ముఖ్యంగా చక్కెర పదార్థాలు, శుద్ధి చేసిన పిండి పదార్థాలతో కూడిన భోజనం ఈ ప్రమాదాన్ని మరింత పెంచుతుంది. నిద్రపోవడానికి కనీసం రెండు, మూడు గంటల ముందు తేలికపాటి ఆహారం తీసుకోవడం మేలు.

2. ప్యాకేజ్డ్ జ్యూస్‌లను ఆరోగ్యకరం అనుకోవడం: పండ్లతో పోలిస్తే ప్యాకేజ్డ్ జ్యూస్‌లలో ఫైబర్ (పీచుపదార్థం) ఉండదు. పైగా, వాటిలో అదనపు చక్కెరలు కలుపుతారు. ఇలాంటి పానీయాలను తరచుగా తాగడం వల్ల శరీరానికి అధిక కేలరీలు అందుతాయి. దీనివల్ల కూడా లివర్‌లో కొవ్వు చేరుతుంది. వీటికి బదులుగా నేరుగా పండ్లను తినడం లేదా నీళ్లు తాగడం ఉత్తమమైన మార్గం.

3. రోజంతా కూర్చొని, కాసేపు వ్యాయామం చేయడం: రోజూ కొద్దిసేపు నడక లేదా జిమ్ చేసినంత మాత్రాన రోజంతా కూర్చోవడం వల్ల కలిగే నష్టాన్ని పూడ్చలేం. ఎక్కువసేపు శారీరక శ్రమ లేకుండా కూర్చోవడం వల్ల ఇన్సులిన్ సెన్సిటివిటీ తగ్గి, శరీరం గ్లూకోజ్, కొవ్వులను సరిగా వినియోగించుకోలేదు. ఇది లివర్‌లో కొవ్వు నిల్వలను ప్రోత్సహిస్తుంది. మధ్యమధ్యలో చిన్నపాటి విరామాలు తీసుకుని నడవడం మంచిది.

4. తగినంత నిద్ర లేకపోవడం: రోజూ ఐదు గంటల కంటే తక్కువ నిద్రపోవడం దీర్ఘకాలంలో జీవక్రియలను దెబ్బతీస్తుంది. ఇది ఆకలి, గ్లూకోజ్ నియంత్రణపై ప్రభావం చూపి బరువు పెరగడానికి, ఫ్యాటీ లివర్‌కు దారితీస్తుంది. ఆరోగ్యంగా ఉండాలంటే పెద్దలు రోజుకు కనీసం 7 నుంచి 9 గంటలు నిద్రపోవాలి.

5. బరువు నార్మల్‌గా ఉంటే ఫర్వాలేదనుకోవడం: బీఎంఐ సాధారణ స్థాయిలో ఉన్నా, సన్నగా కనిపించినా లివర్ ఆరోగ్యంగా ఉందని చెప్పలేం. కొంతమందిలో, ముఖ్యంగా దక్షిణాసియా వాసుల్లో, అవయవాల చుట్టూ కొవ్వు (విసెరల్ ఫ్యాట్) ఎక్కువగా పేరుకుపోతుంది. ఇది ఇన్సులిన్ నిరోధకతకు, ఇతర జీవక్రియ వ్యాధులకు కారణమవుతుంది. నడుము చుట్టుకొలత, రక్తంలో చక్కెర, కొలెస్ట్రాల్ స్థాయిలు కూడా లివర్ ఆరోగ్యాన్ని సూచిస్తాయి.

పరిష్కార మార్గాలు ఏమిటి?
ప్రారంభ దశలో ఉన్న ఫ్యాటీ లివర్ సమస్యను జీవనశైలి మార్పులతో అధిగమించవచ్చు. క్రమం తప్పని వ్యాయామం, సమతుల్య ఆహారం, చక్కెర పానీయాలకు దూరంగా ఉండటం, తగినంత నిద్ర వంటివి మంచి ఫలితాలనిస్తాయి. డయాబెటిస్, అధిక కొలెస్ట్రాల్, పొట్ట దగ్గర కొవ్వు ఎక్కువగా ఉన్నవారు తప్పనిసరిగా వైద్యులను సంప్రదించి లివర్ పరీక్షలు చేయించుకోవాలి. మద్యం తాగకపోయినా, బరువు అదుపులో ఉన్నా ఫ్యాటీ లివర్ వచ్చే అవకాశం ఉందని గుర్తించి, తగిన జాగ్రత్తలు తీసుకోవడం చాలా అవసరం.