డెంటల్ ఇంప్లాంట్ల మొండి ఇన్ఫెక్షన్లకు కారణమిదే.. శాస్త్రవేత్తల కీలక ఆవిష్కరణ

డెంటల్ ఇంప్లాంట్లు చేయించుకున్న వారిలో కొందరికి వచ్చే ఇన్ఫెక్షన్లు ఎందుకు అంత మొండిగా తయారవుతాయి? యాంటీబయాటిక్స్‌ వాడినా ఎందుకు తగ్గవు? అనే ప్రశ్నలకు అమెరికాలోని రట్జర్స్ యూనివర్సిటీ శాస్త్రవేత్తలు సమాధానం కనుగొన్నారు. ఇంప్లాంట్ల నుంచి వెలువడే అతి సూక్ష్మమైన టైటానియం కణాలే రోగనిరోధక వ్యవస్థను దెబ్బతీసి, ఇన్ఫెక్షన్‌ను తీవ్రతరం చేస్తున్నాయని వారి పరిశోధనలో తేలింది. ఈ ఆసక్తికర అధ్యయనం 'పీఎన్ఏఎస్ నెక్సస్' అనే జర్నల్‌లో ప్రచురితమైంది.

సాధారణంగా దంతాలు కోల్పోయిన వారికి డెంటల్ ఇంప్లాంట్లు ఒక మంచి పరిష్కారం. అయితే, వీటిని అమర్చుకున్న వారిలో దాదాపు 10 నుంచి 20 శాతం మంది పెరి-ఇంప్లాంటైటిస్ అనే ఇన్ఫెక్షన్‌తో బాధపడుతున్నారు. ఇంప్లాంట్ చుట్టూ ఉన్న చిగుళ్లు, ఎముకలకు సోకే ఈ ఇన్ఫెక్షన్ సాధారణ చిగుళ్ల వ్యాధి కంటే తీవ్రంగా ఉండి, ఎముకలను సైతం నాశనం చేస్తుంది.

పరిశోధన ప్రకారం, ఇంప్లాంట్ ఉపరితలంపై బ్యాక్టీరియా ఒక పొరగా ఏర్పడుతుంది. ఇది నెమ్మదిగా లోహాన్ని దెబ్బతీసి, సూక్ష్మమైన టైటానియం కణాలను చుట్టుపక్కల కణజాలంలోకి విడుదల చేస్తుంది. బ్యాక్టీరియా విషపదార్థాలతో కూడిన ఈ కణాలు శరీరంలోని మాక్రోఫేజ్‌లు అనే రోగనిరోధక కణాల పనితీరును దెబ్బతీస్తాయి. మామూలుగా ఈ మాక్రోఫేజ్‌లు బ్యాక్టీరియాను గుర్తించి, వాటిని మింగేసి నాశనం చేస్తాయి. కానీ, టైటానియం కణాల ప్రభావానికి గురైనప్పుడు, వాటి పనితీరు మందగిస్తుంది. అవి బ్యాక్టీరియాను నాశనం చేయకపోగా, దీర్ఘకాలిక వాపునకు (inflammation) కారణమవుతున్నాయి. ఈ వాపు వల్ల ఇన్ఫెక్షన్ తగ్గకపోగా, ఇంప్లాంట్ చుట్టూ ఉన్న ఎముక దెబ్బతింటోంది.

ఈ హానికరమైన ప్రక్రియలో TRPC1 అనే ప్రొటీన్ ఛానెల్ కీలక పాత్ర పోషిస్తున్నట్టు పరిశోధకులు గుర్తించారు. జన్యుపరంగా ఈ ప్రొటీన్ లేని ఎలుకలపై ప్రయోగాలు చేసినప్పుడు, వాటిలో వాపు తక్కువగా ఉండటంతో పాటు ఇన్ఫెక్షన్లను సమర్థంగా ఎదుర్కొన్నాయి. దీని ఆధారంగా భవిష్యత్తులో కేవలం యాంటీబయాటిక్స్‌పై కాకుండా, రోగనిరోధక వ్యవస్థను లక్ష్యంగా చేసుకుని కొత్త చికిత్సలు అభివృద్ధి చేసే అవకాశం ఉందని శాస్త్రవేత్తలు భావిస్తున్నారు.

అయితే, ఈ పరిశోధన ఫలితాల ఆధారంగా డెంటల్ ఇంప్లాంట్లు సురక్షితం కాదని భావించరాదని శాస్త్రవేత్తలు స్పష్టం చేస్తున్నారు. చాలా మందిలో ఇవి విజయవంతంగా పనిచేస్తున్నాయని గుర్తుచేశారు. ఈ సమస్యలు రాకుండా ఉండటానికి ఉత్తమ మార్గం క్రమం తప్పకుండా దంత వైద్యులను సంప్రదించడం, ప్రొఫెషనల్ క్లీనింగ్ చేయించుకోవడమేనని వారు సూచిస్తున్నారు.