జనసేనకు మద్దతుగా హైపర్ ఆది ప్రచారం

ఆంధ్రప్రదేశ్‌లో స్థానిక సంస్థల ఎన్నికల ప్రచారం ఊపందుకుంది. ప్రధాన పార్టీల నాయకులు, అభ్యర్థులు విస్తృతంగా పర్యటిస్తున్న వేళ, కూటమి తరఫున స్టార్ క్యాంపెయినర్లు కూడా ప్రచార బరిలోకి దిగుతున్నారు. ఇందులో భాగంగా సినీ నటుడు, జనసేన స్టార్ క్యాంపెయినర్ హైపర్ ఆది పిఠాపురంలో ఎన్నికల ప్రచారం నిర్వహించారు.

పిఠాపురం పట్టణంలో ప్రచార కార్యక్రమంలో ఆది పాల్గొన్నారు. జనసేన మున్సిపల్ ఛైర్మన్ అభ్యర్థి దానం లాజర్ బాబు, కౌన్సిలర్ అభ్యర్థులు సునీత, కామేశ్వరిలకు మద్దతుగా ఆయన ప్రసంగించారు. ఈ సందర్భంగా హైపర్ ఆది మాట్లాడుతూ, "పవన్ కల్యాణ్ అంటే అభివృద్ధి, అభివృద్ధి అంటే పిఠాపురం. అలాంటి పిఠాపురంలో మన గాజు గ్లాసును గెలిపించాలి. పవన్ కల్యాణ్ బలపరిచిన నాయకులను మనం గెలిపించుకుని ఆయనకు గిఫ్ట్‌గా ఇవ్వాలి. అప్పుడే మరింత అభివృద్ధి జరుగుతుంది" అని ఓటర్లకు పిలుపునిచ్చారు.