సీతగా నటించేటప్పుడు బుర్రకు పని చెప్పలేదు.. సాయిపల్లవి ఆసక్తికర వ్యాఖ్యలు!

సీతగా నటించడం తనకు ఓ గొప్ప అనుభవమని నటి సాయిపల్లవి చెప్పింది. రామాయణం సినిమాలో ఆ పాత్రను పోషించేటప్పుడు తన ఆలోచనల కంటే భక్తికే ప్రాధాన్యం ఇచ్చానని తెలిపింది. సీత పాత్ర నుంచి తాను ఏం నేర్చుకోగలనో తెలుసుకోవాలనుకున్నానని వెల్లడించింది. ఈ పాత్రను తన ద్వారా పోషించే అవకాశం ఇవ్వాలని అమ్మవారిని ప్రార్థించానని చెప్పింది.

సీత పాత్రపై ప్రత్యేక దృష్టి
అమితాబ్‌ బచ్చన్‌ వ్యాఖ్యాతగా వ్యవహరిస్తున్న ప్రముఖ క్విజ్‌ షో ‘కౌన్‌ బనేగా కరోడ్‌పతి’ వేదికగా సాయిపల్లవి ఈ విషయాలను పంచుకుంది. ‘రామాయణం’ చిత్రంలో రణ్‌బీర్‌ కపూర్‌, రవి దూబేతో కలిసి ఆమె పాల్గొంది. ఈ సందర్భంగా అమితాబ్‌.. సినిమాలోని పాత్రల గురించి నటీనటులను ప్రశ్నించాడు. సీత పాత్రను పోషించే అవకాశం వచ్చినప్పుడు తన మనసులో ఏమనిపించిందో సాయిపల్లవి వివరించింది.

‘అమ్మవారే నాతో ఆ పాత్ర చేయించాలి’
‘‘సాధారణంగా ఏదైనా పాత్రలో నటించేటప్పుడు ఆ పాత్రకు నేను ఏం చేయగలను అని ఆలోచిస్తాను. కానీ సీతమ్మ పాత్ర విషయంలో మాత్రం భిన్నంగా అనిపించింది. ఈ పాత్ర ద్వారా నేను ఏం నేర్చుకోగలను? ఎలాంటి జ్ఞానం పొందగలను? అని ఆలోచించాను. అందుకే ఈసారి నా బుర్రకు ఎక్కువ పని చెప్పాలనుకోలేదు. నాకు తెలిసిన విషయాలను కూడా పక్కనపెట్టి, ఎలాంటి ముందస్తు అభిప్రాయాలు లేకుండా ఉండాలనుకున్నాను. కేవలం ప్రార్థన చేశాను. ‘అమ్మా.. నా ద్వారా ఆ పాత్రను పోషించు’ అని వేడుకున్నాను. అంతే..’’ అని సాయిపల్లవి చెప్పారు. ఆమె మాటలను విన్న అమితాబ్‌ బచ్చన్‌ అభినందించారు. చాలా మంచి విషయం చెప్పావని ప్రశంసించారు.