భారత్‌లో ఈ 10 విషయాలు అద్భుతం: ఫిదా అయిన ఫిన్లాండ్ ఫ్యామిలీ!

భారత్‌లో మనకు నిత్యం అందుబాటులో ఉండి, అత్యంత సాధారణమనిపించే పలు సౌకర్యాలు విదేశీయులను ఎంతగా ఆశ్చర్యపరుస్తాయో ముంబైలో నివసిస్తున్న ఓ ఫిన్లాండ్ కుటుంబం వివరిస్తోంది. భారతదేశపు దైనందిన జీవనశైలిలో తమను అబ్బురపరిచిన పది అంశాలను ప్రస్తావిస్తూ వారు రూపొందించిన ఒక ఇన్‌స్టాగ్రామ్ వీడియో ప్రస్తుతం సోషల్ మీడియాలో లక్షలాది వ్యూస్ తో వైరల్‌గా మారింది.

"ముంబైలో నివసిస్తున్న ఫిన్లాండ్ కుటుంబంగా మమ్మల్ని ఇప్పటికీ ఆశ్చర్యపరుస్తున్న 10 విషయాలు ఇవి. 10 నిమిషాల వ్యవధిలో జరిగే డెలివరీల నుంచి యూపీఐ చెల్లింపుల వరకు, అద్భుతమైన సినిమా థియేటర్ల నుంచి నిత్య జీవితంలో లభించే సేవలు వరకు... భారతదేశం మమ్మల్ని నిరంతరం విస్మయానికి గురిచేస్తూనే ఉంది. ఇక్కడి కొన్ని సౌకర్యాలు అత్యంత అద్భుతంగా ఉన్నాయి, వీటిని చూసి ప్రపంచంలోని మిగిలిన దేశాలు ఎంతో నేర్చుకోవచ్చని మేము భావిస్తున్నాం" అని ఆ కుటుంబం తమ వీడియోకు క్యాప్షన్ జోడించింది.

వారిని ఆశ్చర్యపరిచిన అంశాలు ఇవే..

ఆ కుటుంబం ప్రస్తావించిన విషయాల్లో డిజిటల్ ఇండియా పురోగతి స్పష్టంగా కనిపిస్తుంది. ముఖ్యంగా, అతి స్వల్ప మొత్తాలకు సైతం క్యూఆర్ కోడ్‌ను స్కాన్ చేసి క్షణాల్లో చెల్లింపులు పూర్తి చేసే యూపీఐ వ్యవస్థ వారిని ఎంతగానో ఆకట్టుకుంది. అలాగే, కేవలం 10 నిమిషాల్లోనే కిరాణా సరుకులు, నిత్యావసరాలు ఇంటికి డెలివరీ కావడం మరొక అద్భుతమని వారు పేర్కొన్నారు.

వీటితో పాటు స్మార్ట్‌ఫోన్ యాప్‌ల ద్వారా ట్యాక్సీలు బుక్ చేసుకోవడం, ఆహారాన్ని ఆర్డర్ చేయడం, బిల్లులు చెల్లించడం వంటి డిజిటల్ సేవలు తమ జీవితాన్ని మరింత సులభతరం చేశాయని వారు తెలిపారు. క్లీనింగ్, మరమ్మతులు, ఇన్‌స్టాలేషన్స్ వంటి పనుల కోసం హోమ్ సర్వీస్ యాప్‌ల ద్వారా నిపుణులను ఇంటికి రప్పించుకునే సౌకర్యం, ప్రైవేటు ఆసుపత్రులలో సులభంగా అపాయింట్‌మెంట్లు పొందడం, అత్యవసర సమయాల్లో యాప్‌ల ద్వారానే అంబులెన్స్‌ను పిలిపించే వెసులుబాటు వంటివి తమ స్వదేశంలో ఊహించలేమని వారు అభిప్రాయపడ్డారు.

ముంబై మెట్రోలో పరిశుభ్రత, సౌకర్యం, తక్కువ ఖర్చుతో కూడిన ప్రయాణ సౌలభ్యంపై వారు ప్రశంసలు కురిపించారు. వీధి దుకాణాల నుంచి భారీ షాపింగ్ మాల్స్ వరకు ఉన్న విస్తృతమైన కొనుగోలు అవకాశాలు, అత్యాధునిక స్క్రీన్లు, సౌండ్ సిస్టమ్‌లతో కూడిన సినిమా హాళ్ల నాణ్యత కూడా తమను ఆకట్టుకున్నాయని ఆ కుటుంబం తమ వీడియోలో వివరించింది.

ఈ వీడియో ఆన్‌లైన్‌లో విస్తృత చర్చకు దారితీసింది. భారతీయులకు అత్యంత సహజంగా, దైనందిన జీవితంలో అంతర్భాగంగా మారిపోయిన ఈ సేవలు, విదేశీయులకు ఎంత విశిష్టంగా, అసాధారణంగా కనిపిస్తున్నాయో ఈ వీడియో నిరూపిస్తోందని నెటిజన్లు వ్యాఖ్యానిస్తున్నారు. భారత్ సాధించిన డిజిటల్ విప్లవానికి, మౌలిక వసతుల అభివృద్ధికి ఇది నిదర్శనమని పలువురు అభిప్రాయపడుతున్నారు.