ఓ ఉబెర్ డ్రైవర్ సరికొత్త మోసం.. ఫేక్ స్క్రీన్‌షాట్‌తో రెట్టింపు చార్జీ వసూలుకు యత్నం!

క్యాబ్ సర్వీసులను వినియోగించే ప్రయాణికులకు ఇది ఒక హెచ్చరిక. ముఖ్యంగా ఎయిర్‌పోర్ట్‌ల నుంచి క్యాబ్ బుక్ చేసుకునే వారు మరింత అప్రమత్తంగా ఉండాలని తాజా ఘటన స్పష్టం చేస్తోంది. ఢిల్లీ ఎయిర్‌పోర్ట్‌లో ఓ ఉబెర్ డ్రైవర్, ప్రయాణికుడిని మోసం చేసేందుకు ప్రయత్నించి అడ్డంగా దొరికిపోయాడు. ట్రిప్ ముగియకముందే, రెట్టింపు చార్జీతో ఉన్న ఫేక్ స్క్రీన్‌షాట్‌ను చూపించి డబ్బులు దండుకోవాలని చూశాడు. కానీ, ప్రయాణికుడు సమయస్ఫూర్తితో వ్యవహరించి ఆ మోసాన్ని బట్టబయలు చేశాడు. ఈ ఉదంతం ఇప్పుడు సోషల్ మీడియాలో వైరల్ అవుతోంది.

ఓ ప్రయాణికుడు ఢిల్లీ ఎయిర్‌పోర్ట్ నుంచి తన గమ్యస్థానానికి ఉబెర్ క్యాబ్ బుక్ చేసుకున్నాడు. ప్రయాణం సాధారణంగానే ప్రారంభమైనా, "మీరు క్యాష్ ఇస్తారా లేక ఆన్‌లైన్ పేమెంట్ చేస్తారా?" అని డ్రైవర్ అడగడంతో అతనికి మొదటి అనుమానం వచ్చింది. గమ్యస్థానం చేరిన తర్వాత, డ్రైవర్ తన యాప్‌లో ట్రిప్‌ను ముగించకుండా, ఫోన్‌లో ఒక స్క్రీన్‌షాట్‌ను చూపించాడు. అందులో చార్జీ రూ. 1,780గా ఉంది. "చూడండి, నేను మీకు రేటింగ్ కూడా ఇవ్వగలను. చార్జీ ఎక్కువగా రావడం వల్ల మీ ఫోన్‌లో ట్రిప్ ఎండ్ అవ్వడానికి సమయం పడుతుంది" అంటూ నమ్మించే ప్రయత్నం చేశాడు.

అంతేకాకుండా, "మీరు ముందుగా రూ. 1,780 చెల్లించండి. ఆ తర్వాత ఉబెర్ కస్టమర్ కేర్‌కు ఫిర్యాదు చేస్తే మీకు రిఫండ్ వస్తుంది" అని సలహా ఇచ్చాడు. అయితే, అప్రమత్తమైన ప్రయాణికుడు వెంటనే తన ఫోన్‌లోని ఉబెర్ యాప్‌ను చెక్ చేయగా, ట్రిప్ ఇంకా యాక్టివ్‌గానే ఉండటం, అసలు చార్జీ రూ. 885 మాత్రమేనని చూపించడం గమనించాడు. వెంటనే యాప్‌లోని సపోర్ట్ ఆప్షన్‌ ద్వారా ఉబెర్ కస్టమర్ కేర్‌కు కాల్ చేసి, ఫోన్‌ను స్పీకర్‌లో పెట్టాడు.

కస్టమర్ కేర్ ఏజెంట్ మాట్లాడుతూ, తమ రికార్డుల ప్రకారం చార్జీ రూ. 885 మాత్రమేనని, ట్రిప్ ఇంకా ముగియలేదని స్పష్టం చేశారు. డ్రైవర్‌ను యాప్ క్లోజ్ చేసి మళ్లీ ఓపెన్ చేయమని సూచించారు. దీంతో తన మోసం పనిచేయదని గ్రహించిన డ్రైవర్, ఏమీ వాదించకుండానే అక్కడినుంచి నిష్క్రమించాడు. అతడు వెళ్లిపోయిన రెండు నిమిషాల తర్వాత, ట్రిప్‌ ముగిసినట్టు అప్ డేట్ వచ్చింది. డ్రైవర్ బహుశా ఉబెర్ స్క్రీన్‌ను పోలిన ఫేక్ స్క్రీన్‌లను సృష్టించే "స్పూఫింగ్ యాప్" వాడి ఉండవచ్చని సదరు ప్రయాణికుడు అనుమానం వ్యక్తం చేశాడు.

"ఎయిర్‌పోర్ట్ నుంచి వచ్చే ఉబెర్ డ్రైవర్లతో ఈ స్కామ్ విషయంలో జాగ్రత్త" అనే శీర్షికతో తన అనుభవాన్ని సోషల్ మీడియాలో పంచుకోవడంతో ఈ పోస్ట్ వైరల్‌గా మారింది. దీనిపై స్పందించిన అనేక మంది నెటిజన్లు, ఇలాంటి మోసాల బారిన పడకుండా ఉండాలంటే ఆన్‌లైన్ పేమెంట్ చేయడం ఉత్తమ మార్గమని సూచించారు. "అందుకే నేను ఎప్పుడూ ఆన్‌లైన్‌లోనే చెల్లిస్తాను. వివాదం వస్తే కస్టమర్ సపోర్ట్‌ను సంప్రదించవచ్చు" అని ఒకరు పేర్కొన్నారు.

మరోవైపు, ఒక మహిళా ప్రయాణికురాలు తనకు రాపిడో రైడ్‌లో ఇలాంటి అనుభవమే ఎదురైందని, డ్రైవర్ తనను క్యాబ్ నుంచి దిగనివ్వకుండా ఇబ్బంది పెట్టాడని వాపోయింది. మొత్తంగా, క్యాబ్ ప్రయాణాల్లో అప్రమత్తంగా ఉండటం, డిజిటల్ చెల్లింపులకు ప్రాధాన్యత ఇవ్వడం ద్వారా ఇలాంటి మోసాలను నివారించవచ్చని ఈ ఘటన స్పష్టం చేస్తోంది.