పోలీసులకే టోకరా.. ధనవంతుడిలా ఫోజులిస్తూ 20 మంది మహిళా కానిస్టేబుళ్లను రూ. 24 లక్షల మేర మోసగించిన కేటుగాడు!

సమాజంలో నేరాలను అరికట్టాల్సిన పోలీసులకే ఓ కేటుగాడు టోకరా వేశాడు. తాను పెద్ద వ్యాపారవేత్తనని నమ్మించి, పెళ్లి చేసుకుంటానని చెప్పి సుమారు 20 మంది మహిళా కానిస్టేబుళ్ల నుంచి రూ. 24 లక్షలు కాజేశాడు. బాధితుల ఫిర్యాదుతో రంగంలోకి దిగిన ఢిల్లీ పోలీసులు, ఈ ఘరానా మోసగాడిని అరెస్ట్ చేశారు. ఈ ఘటన దేశ రాజధానిలో సంచలనం సృష్టిస్తోంది.

పోలీసులు తెలిపిన వివరాల ప్రకారం.. విక్రాంత్ తోమర్ (23) అనే యువకుడు విలాసవంతమైన జీవితానికి అలవాటు పడ్డాడు. సులువుగా డబ్బు సంపాదించేందుకు మోసాల బాట పట్టాడు. ముఖ్యంగా మహిళా పోలీసులనే లక్ష్యంగా చేసుకుని తన వలపు వల విసిరాడు. కరోల్ బాగ్ పోలీస్ స్టేషన్‌లో పనిచేస్తున్న ఓ మహిళా కానిస్టేబుల్, తాను మోసపోయానంటూ ఉన్నతాధికారులకు ఫిర్యాదు చేయడంతో ఈ వ్యవహారం వెలుగులోకి వచ్చింది. పోలీసులు వెంటనే దర్యాప్తు ప్రారంభించి, బురారీ ప్రాంతంలో నిందితుడు విక్రాంత్‌ను అదుపులోకి తీసుకున్నారు.

ఇన్‌స్టాగ్రామ్‌తో ఎర.. నమ్మించి మోసం
నిందితుడి మోసం చేసే తీరు చాలా పక్కాగా, ఆధునికంగా ఉంది. ఇన్‌స్టాగ్రామ్‌లో తాను ఓ సంపన్న కుటుంబానికి చెందిన వ్యాపారవేత్తగా ప్రొఫైల్ సృష్టించాడు. ఖరీదైన రెస్టారెంట్లు, విలాసవంతమైన కార్లు, ఖరీదైన ప్రదేశాల్లో గడిపిన ఫొటోలను పోస్ట్ చేస్తూ ఆడంబరమైన జీవితాన్ని ప్రదర్శించేవాడు. ఈ ఫొటోలను చూసి ఆకర్షితులైన మహిళా కానిస్టేబుళ్లతో స్నేహం పెంచుకునేవాడు. బాధితుల్లో చాలామంది ఒకే బ్యాచ్‌కు చెందిన వారు ఉండటం గమనార్హం.

వారిలో నమ్మకం కలిగించేందుకు, నిందితుడు స్వల్పకాలానికి లగ్జరీ కార్లను అద్దెకు తీసుకునేవాడు. ఆ కార్లలో వారిని విహారానికి తీసుకెళ్లి, తాను నిజంగానే ధనవంతుడినని నమ్మించేవాడు. వారి నమ్మకాన్ని పూర్తిగా చూరగొన్న తర్వాత, తన అసలు స్వరూపం బయటపెట్టేవాడు. 

వ్యాపారంలో నష్టం వచ్చిందని, కుటుంబంలో అత్యవసర పరిస్థితి ఏర్పడిందని రకరకాల కట్టుకథలు చెప్పి వారి నుంచి డబ్బులు వసూలు చేసేవాడు. ఇలా సుమారు 20 మంది నుంచి రూ. 24 లక్షల వరకు వసూలు చేసినట్లు పోలీసులు గుర్తించారు. ఈ డబ్బులో కొంత భాగాన్ని ఓ బెట్టింగ్ యాప్‌తో అనుసంధానమైన ఖాతాలకు బదిలీ చేసినట్లు ప్రాథమిక దర్యాప్తులో తేలింది.

సహజీవనం చేస్తున్న మహిళా కానిస్టేబుల్ పాత్రపై అనుమానం
ఈ కేసులో మరో కీలకమైన కోణం వెలుగులోకి వచ్చింది. నిందితుడు విక్రాంత్ తోమర్ ఓ మహిళా కానిస్టేబుల్‌తో సహజీవనం చేస్తున్నాడు. ఆమె ద్వారానే ఇతర మహిళా కానిస్టేబుళ్ల వివరాలు, వారి బలహీనతలు తెలుసుకుని ఉంటాడని పోలీసులు అనుమానిస్తున్నారు. ఆమె పరిచయాలను ఉపయోగించుకునే బాధితులను లక్ష్యంగా చేసుకున్నాడా? అనే కోణంలోనూ దర్యాప్తు చేస్తున్నారు.

నిందితుడికి నేర చరిత్ర కూడా ఉంది. గతంలోనూ ఇలాంటి మోసాలకు పాల్పడినందుకు అతనిపై ఢిల్లీలో పలు ఎఫ్ఐఆర్‌లు నమోదయ్యాయి. ఈ ఏడాది ప్రారంభంలోనే ఓ కేసులో బెయిల్‌పై బయటకు వచ్చాడు. అయినప్పటికీ, తన పంథా మార్చుకోకుండా మళ్లీ అదే తరహా మోసాలకు పాల్పడ్డాడు. ప్రస్తుతం పోలీసులు నిందితుడిని విచారిస్తూ, డబ్బు ఎక్కడికి మళ్లించాడనే కోణంలో దర్యాప్తు ముమ్మరం చేశారు. ఇంకా ఎవరైనా బాధితులు ఉన్నారా అనే దానిపైనా ఆరా తీస్తున్నారు.