తూర్పుగోదావరి జిల్లాలో పెద్ద పులి కలకలం.. స్పెయిన్ నుంచి మంత్రి కందుల దుర్గేశ్ వీడియో సందేశం

తూర్పుగోదావరి జిల్లా నిడదవోలు నియోజకవర్గంలో పెద్దపులి సంచారం స్థానికంగా తీవ్ర కలకలం రేపుతోంది. వేలివెన్ను, కాల్దారి, పసలపూడి గ్రామాల పరిధిలోని పంట పొలాల్లో పులి తిరుగుతుండటంతో ప్రజలు, రైతులు భయాందోళనలకు గురవుతున్నారు. పొలం పనులకు వెళ్లేందుకు రైతులు, వ్యవసాయ కూలీలు జంకుతున్నారు.

ఈ విషయంపై మంత్రి కందుల దుర్గేశ్ స్పందించారు. ప్రస్తుతం స్పెయిన్‌లో పర్యటనలో ఉన్న ఆయన, అక్కడి నుంచే ఒక సెల్ఫీ వీడియో సందేశం ద్వారా ప్రజలకు సూచనలు చేశారు. ప్రజలెవరూ ఆందోళన చెందవద్దని, పులిని బంధించేందుకు అటవీశాఖ అన్ని చర్యలు తీసుకుంటోందని భరోసా ఇచ్చారు. పులి కదలికలను జీపీఎస్ ట్రాకర్లు, డ్రోన్లు, కెమెరా ట్రాప్‌ల సాయంతో నిరంతరం గమనిస్తున్నామని తెలిపారు. పులిని పట్టుకునేందుకు పలుచోట్ల బోన్లను కూడా ఏర్పాటు చేసినట్లు వెల్లడించారు.

పరిస్థితులు చక్కబడే వరకు ప్రజలు అత్యవసరమైతే తప్ప ఇళ్ల నుంచి బయటకు రావద్దని మంత్రి విజ్ఞప్తి చేశారు. ముఖ్యంగా రైతులు, క్వారీ కార్మికులు మరింత అప్రమత్తంగా ఉండాలని సూచించారు. అటవీశాఖ అధికారులు క్షేత్రస్థాయిలో ఉండి పరిస్థితిని సమీక్షిస్తున్నారు.