వందల ప్రాణాలు కాపాడిన హీరో మన పైలట్.. దేశం గర్విస్తోంది.. కెప్టెన్ స్మిత్‌కు ప్రధాని మోదీ సెల్యూట్!

ఫ్లైదుబాయ్ విమానాన్ని కూల్చివేసేందుకు సహ పైలట్ చేసిన కుట్రను భగ్నం చేసి, వందలాది మంది ప్రయాణికుల ప్రాణాలను కాపాడిన భారత పైలట్ కెప్టెన్ స్మిత్ మచ్చర్‌పై ప్రధానమంత్రి నరేంద్ర మోదీ ప్రశంసల వర్షం కురిపించారు. ఆయన అసలైన హీరో అని, ఆయన చూపిన ధైర్యసాహసాలకు దేశం గర్విస్తోందని కొనియాడారు. తీవ్రంగా గాయపడినప్పటికీ స్మిత్ చూపిన ధైర్యం ఒక పెను విషాదాన్ని నివారించిందని అన్నారు.

ఏం జరిగిందంటే..!
నిన్న‌ ఉదయం దుబాయ్ నుంచి టెల్ అవీవ్‌కు 170 మందికి పైగా ప్రయాణికులతో బయలుదేరిన ఫ్లైదుబాయ్ విమానంలో ఈ నాటకీయ ఘటన చోటుచేసుకుంది. బోయింగ్ 737 విమానం 34,000 అడుగుల ఎత్తులో ప్రయాణిస్తున్న సమయంలో సహ పైలట్ విమానాన్ని నేలకూల్చేందుకు ప్రయత్నించాడు. ఈ ప్రమాదాన్ని పసిగట్టిన కెప్టెన్ స్మిత్ మచ్చర్ అతడిని అడ్డుకున్నారు. 

ఈ క్రమంలో ఆగ్రహంతో ఊగిపోయిన సహ పైలట్, కెప్టెన్‌పై కత్తితో దాడి చేసి తీవ్రంగా గాయపరిచాడు. ఈ గందరగోళంలో విమానం నియంత్రణ కోల్పోయి, నిమిషానికి దాదాపు 23,000 అడుగుల వేగంతో కిందకి పడిపోతూ 15,600 అడుగుల ఎత్తుకు చేరుకుంది. అంతటి క్లిష్ట పరిస్థితుల్లోనూ ధైర్యం కోల్పోని కెప్టెన్ స్మిత్, ప్రయాణికుల సహాయంతో సహ పైలట్‌ను నిలువరించి విమానాన్ని సురక్షితంగా అదుపులోకి తెచ్చారు.

దేశం గర్విస్తోందన్న ప్రధాని
ఈ ఘటనపై ప్రధాని మోదీ ‘ఎక్స్’ (ట్విట్టర్) వేదికగా స్పందించారు. "కెప్టెన్ స్మిత్ మచ్చర్ ఒక హీరో. అత్యంత ప్రమాదకర పరిస్థితుల్లో, తీవ్రంగా గాయపడినప్పటికీ, ఆయన అపారమైన ధైర్యాన్ని, స్థైర్యాన్ని ప్రదర్శించారు. ఇతరుల ప్రాణాలను కాపాడాలన్న ఆయన సంకల్పం వందలాది మంది ప్రాణాలను నిలబెట్టి, ఒక పెను విషాదాన్ని నివారించింది. కెప్టెన్ మచ్చర్‌ను చూసి భారత్ గర్విస్తోంది" అని మోదీ తన పోస్టులో పేర్కొన్నారు. స్మిత్ త్వరగా కోలుకుని, సంపూర్ణ ఆరోగ్యంతో తిరిగి రావాలని ఆకాంక్షించారు.

అనుభవజ్ఞుడైన పైలట్ స్మిత్
భారత పౌరుడైన కెప్టెన్ స్మిత్ మచ్చర్, గత నాలుగేళ్లుగా ఎమిరాటీ ప్రభుత్వానికి చెందిన ఫ్లైదుబాయ్‌లో పనిచేస్తున్నారు. అంతకుముందు పదేళ్లపాటు భారత విమానయాన సంస్థ స్పైస్‌జెట్‌లో విధులు నిర్వర్తించారు. ఆయనకు బోయింగ్ 737 విమానాలను నడపడంలో 13 ఏళ్లకు పైగా అనుభవం ఉంది. లైన్ ట్రైనింగ్ కెప్టెన్‌గా పనిచేసిన స్మిత్, ఇప్పటివరకు 9,750 గంటలకు పైగా విమానాలు నడిపిన అనుభవజ్ఞుడు.