ప్రపంచ యూనివర్సిటీ ర్యాంకింగ్స్‌లో భారత్‌ ఎక్కడ?

బెంగళూరులోని ‘ఇండియన్‌ ఇన్‌స్టిట్యూట్‌ ఆఫ్‌ సైన్స్‌’ (ఐఐఎస్సీ) మరోసారి భారతీయ యూనివర్సిటీల్లో అత్యుత్తమ స్థానంలో నిలిచింది. ‘టైమ్స్‌ హయ్యర్‌ ఎడ్యుకేషన్‌’ (టీహెచ్‌ఈ) వరల్డ్‌ యూనివర్సిటీ ర్యాంకింగ్స్‌ 2027లో ఐఐఎస్సీ ప్రపంచవ్యాప్తంగా 254వ స్థానాన్ని దక్కించుకుంది. అయితే టాప్‌-200లో ఒక్క భారతీయ విద్యాసంస్థకూ చోటు దక్కలేదు.

ఈసారి టీహెచ్‌ఈ ర్యాంకింగ్స్‌లో భారత్‌ నుంచి 143 యూనివర్సిటీలు ఉన్నాయి. గతేడాదితో పోలిస్తే 15 సంస్థలు పెరిగాయి. వరుసగా రెండో ఏడాది ఆసియాలో అత్యధిక యూనివర్సిటీలకు ప్రాతినిధ్యం వహించిన దేశంగా భారత్‌ నిలిచింది.

ఐఐఎస్సీ తర్వాత సేవిత ఇన్‌స్టిట్యూట్‌ ఆఫ్‌ మెడికల్‌ అండ్‌ టెక్నికల్‌ సైన్సెస్‌ 326-350 ర్యాంకింగ్‌ బ్యాండ్‌లో ఉంది. షూలిని యూనివర్సిటీ 451-500 బ్యాండ్‌లో నిలిచింది. జామియా మిల్లియా ఇస్లామియా, కేఐఐటీ యూనివర్సిటీ 501-550 బ్యాండ్‌లో చోటు సంపాదించాయి.

2026 ర్యాంకింగ్స్‌తో పోలిస్తే సేవిత 351-400 నుంచి 326-350 బ్యాండ్‌కు చేరింది. కేఐఐటీ 601-800 నుంచి 501-550కి వచ్చింది. షూలిని 401-500 నుంచి 451-500 బ్యాండ్‌లో ఉంది. జామియా మిల్లియా ఇస్లామియా 401-500 నుంచి 501-550 బ్యాండ్‌కు వెళ్లింది. ఐఐఎస్సీ గతేడాది 201-250 బ్యాండ్‌లో ఉండగా.. ఈసారి 254వ స్థానంలో నిలిచింది.

ఐఐఎస్సీ మొత్తం 57.0 స్కోరు సాధించింది. పరిశోధన వాతావరణంలో 98.0 స్కోరు నమోదు చేసింది. బోధనలో 62.1, పరిశోధన నాణ్యతలో 58.6 స్కోర్లు వచ్చాయి. సేవిత మొత్తం స్కోరు 52.3-53.3 మధ్య ఉంది.

టీహెచ్‌ఈ 2027 ర్యాంకింగ్స్‌లో 118 దేశాలు, ప్రాంతాలకు చెందిన 2,297 యూనివర్సిటీలు ఉన్నాయి. ఆసియా నుంచి 1,000కుపైగా యూనివర్సిటీలు ఈ జాబితాలో ఉన్నాయి. గతేడాది ఈ సంఖ్య 929.

ప్రపంచ ర్యాంకింగ్స్‌లో ఆక్స్‌ఫర్డ్‌ యూనివర్సిటీ మొదటి స్థానాన్ని దక్కించుకుంది. వరుసగా 11వ ఏడాది ఆక్స్‌ఫర్డ్‌ టాప్‌లో నిలిచింది. ఎంఐటీ రెండో స్థానంలో, ప్రిన్స్‌టన్‌-స్టాన్‌ఫోర్డ్‌ సంయుక్తంగా మూడో స్థానంలో ఉన్నాయి. కేంబ్రిడ్జ్‌ ఐదో స్థానంలో నిలిచింది.