వారణాసిలో సీఎం చంద్రబాబు.. కాశీ విశ్వనాథునికి కేంద్ర మంత్రులతో కలిసి ప్రత్యేక పూజలు

ఆంధ్రప్రదేశ్ ముఖ్యమంత్రి నారా చంద్రబాబు నాయుడు గురువారం ఉత్తరప్రదేశ్‌లోని వారణాసిలో పర్యటించారు. ఈ సందర్భంగా ఆయన శ్రీ కాశీ విశ్వనాథ స్వామిని దర్శించుకుని ప్రత్యేక పూజలు నిర్వహించారు. ఈ కార్యక్రమంలో ఆయన వెంట ఉత్తరప్రదేశ్ ముఖ్యమంత్రి యోగి ఆదిత్యనాథ్, కేంద్ర రక్షణ శాఖ మంత్రి రాజ్‌నాథ్ సింగ్, కేంద్ర ఆహార శుద్ధి పరిశ్రమల శాఖ మంత్రి చిరాగ్ పాశ్వాన్ పాల్గొన్నారు.

ప్రధానమంత్రి నరేంద్ర మోదీ ముఖ్యమంత్రిగా, ప్రధానమంత్రిగా 25 ఏళ్ల పాలనా ప్రస్థానాన్ని పూర్తి చేసుకున్న సందర్భంగా వారణాసిలో "వాద్‌నగర్ సేవాయాత్ర" కార్యక్రమాన్ని నిర్వహించారు. ఈ కార్యక్రమంలో పాల్గొనేందుకు చంద్రబాబు వారణాసి చేరుకున్నారు. పర్యటనలో భాగంగా ఆయన ప్రముఖ పుణ్యక్షేత్రమైన కాశీ విశ్వనాథ ఆలయాన్ని సందర్శించారు. ఆలయానికి చేరుకున్న చంద్రబాబుకు పండితులు, అధికారులు పూర్ణకుంభంతో స్వాగతం పలికారు.

అనంతరం చంద్రబాబు, ఇతర ప్రముఖులు గర్భగుడిలో కాశీ విశ్వనాథునికి పవిత్ర జలాలతో అభిషేకం చేశారు. వేద పండితుల మంత్రోచ్ఛారణల మధ్య ప్రత్యేక పూజలు నిర్వహించారు. దర్శనానంతరం ఆలయ అర్చకులు ముఖ్యమంత్రి చంద్రబాబుకు ఆశీర్వచనాలు అందించి, స్వామివారి తీర్థప్రసాదాలను అందజేశారు. పూజల ముగిసిన తర్వాత సీఎం చంద్రబాబు, కేంద్ర మంత్రులు, యూపీ సీఎం యోగి కలిసి ఆలయ ప్రాంగణంలో భక్తులకు ప్రసాదాన్ని పంపిణీ చేశారు.

ఈ పర్యటనలో ముఖ్యమంత్రి చంద్రబాబు వెంట టీడీపీ ఎంపీలు లావు శ్రీకృష్ణదేవరాయలు, సానా సతీష్ కుమార్ కూడా ఉన్నారు. జాతీయ స్థాయిలో ఎన్డీయే కూటమి ఆధ్వర్యంలో జరిగిన ఈ కీలక కార్యక్రమంలో చంద్రబాబు పాల్గొనడం ప్రాధాన్యత సంతరించుకుంది.