ఏపీలో ఫ్రీహోల్డ్ భూములపై కీలక నిర్ణయం.. రైతులకు భారీ ఊరట

ఆంధ్రప్రదేశ్‌లో ఫ్రీహోల్డ్ భూముల రిజిస్ట్రేషన్లపై నెలకొన్న ఉత్కంఠకు తెరపడింది. నిబంధనల మేరకు ఉన్న సుమారు 9.09 లక్షల ఎకరాల ఫ్రీహోల్డ్ భూముల రిజిస్ట్రేషన్లకు అనుమతినిస్తూ రాష్ట్ర ప్రభుత్వం మంగళవారం కీలక ఉత్తర్వులు జారీ చేసింది. గత ప్రభుత్వ హయాంలో జరిగిన ఫ్రీహోల్డ్ ప్రక్రియలో అవకతవకలు జరిగాయన్న ఆరోపణల నేపథ్యంలో, 2024 ఆగస్టులో విధించిన తాత్కాలిక నిషేధాన్ని పాక్షికంగా ఎత్తివేయడంతో లక్షలాది మంది రైతులకు ఊరట లభించినట్లయింది.

ప్రభుత్వ తాజా నిర్ణయం ప్రకారం.. చట్టబద్ధంగా ఫ్రీహోల్డ్ హోదా పొందిన 7.85 లక్షల ఎకరాల అసైన్డ్ భూములతో పాటు, 1.36 లక్షల ఎకరాల గ్రామసేవా ఇనాం భూముల రిజిస్ట్రేషన్లకు మార్గం సుగమమైంది. పొరపాటున అసైన్డ్‌గా వర్గీకరించిన 5,422 ఎకరాల ప్రైవేట్ పట్టా భూములకు కూడా ప్రభుత్వం క్లియరెన్స్ ఇచ్చింది. అయితే, నిబంధనలు ఉల్లంఘించి ఫ్రీహోల్డ్‌గా మార్చిన 3.63 లక్షల ఎకరాలపై నిషేధం కొనసాగుతుందని ప్రభుత్వం స్పష్టం చేసింది. వీటిలో తీవ్రమైన అక్రమాలు జరిగినట్లు గుర్తించిన 64,000 ఎకరాలపై ఆర్డీవోలు, సబ్-కలెక్టర్లతో లోతైన విచారణ జరిపించి చట్టపరమైన చర్యలు తీసుకోనున్నారు.

గత వైసీపీ ప్రభుత్వ హయాంలో అసైన్డ్ భూముల చట్టానికి సవరణలు చేసి, 20 ఏళ్లు దాటిన వ్యవసాయ భూములు, 10 ఏళ్లు దాటిన ఇంటి స్థలాలను ఫ్రీహోల్డ్‌గా మార్చుకునే అవకాశం కల్పించారు. అయితే ఈ ప్రక్రియలో అక్రమాలు జరిగాయని ఫిర్యాదులు రావడంతో ప్రస్తుత కూటమి ప్రభుత్వం మంత్రుల ఉపసంఘంతో సమీక్ష నిర్వహించి ఈ నిర్ణయం తీసుకుంది.

రిజిస్ట్రేషన్ల ప్రక్రియ పారదర్శకంగా జరిగేందుకు, నాలుగు వారాల్లోగా వెబ్‌ల్యాండ్ సహా అన్ని ఎలక్ట్రానిక్ రికార్డులను నవీకరించాలని రెవెన్యూ శాఖ ప్రత్యేక ప్రధాన కార్యదర్శి జి.సాయిప్రసాద్ అధికారులను ఆదేశించారు. ఇకపై రిజిస్ట్రేషన్ చేసే ముందు సబ్-రిజిస్ట్రార్లు తప్పనిసరిగా వెబ్‌ల్యాండ్ ఏపీఐ ద్వారా భూమి వివరాలను ధ్రువీకరించుకోవాల్సి ఉంటుంది.