శ్రీవారికి లాంఛనంగా పట్టువస్త్రాలు సమర్పించడం నా అదృష్టం: సీఎం చంద్రబాబు

తిరుమలలోని క్రమశిక్షణతో కూడిన, పారదర్శకమైన ఆలయ నిర్వహణ దేశంలోని ఇతర దేవాలయాలకు ఒక స్ఫూర్తి అని ముఖ్యమంత్రి నారా చంద్రబాబు నాయుడు ప్రశంసించారు. శ్రీవారి సాలకట్ల బ్రహ్మోత్సవాల సందర్భంగా మంగళవారం ఆయన రాష్ట్ర ప్రభుత్వం తరపున స్వామివారికి పట్టువస్త్రాలు సమర్పించారు. స్వామివారికి పట్టువస్త్రాలు సమర్పించే ఈ పవిత్ర కార్యం తన అదృష్టమని ఆయన పేర్కొన్నారు.

కుటుంబ సమేతంగా తిరుమల చేరుకున్న చంద్రబాబు, తొలుత బేడీ ఆంజనేయస్వామి ఆలయంలో ప్రత్యేక పూజలు నిర్వహించారు. అనంతరం, మంగళ వాయిద్యాల నడుమ పట్టువస్త్రాలను శిరస్సుపై ఉంచుకుని శ్రీవారి ఆలయానికి చేరుకున్నారు. స్వామివారికి వస్త్రాలు సమర్పించి, దర్శనం చేసుకున్నారు. ఆ తర్వాత, ఆలయ పండితులు ముఖ్యమంత్రికి, ఆయన కుటుంబ సభ్యులకు వేదాశీర్వచనాలు అందించగా, అధికారులు శ్రీవారి తీర్థప్రసాదాలను అందజేశారు.

ఈ సందర్భంగా ముఖ్యమంత్రి మాట్లాడుతూ, "రాష్ట్రంలో పుష్కలంగా వర్షాలు కురిసి, ప్రజలందరూ ఆయురారోగ్యాలతో, సుఖసంతోషాలతో ఉండాలని ఆ దేవదేవుడిని ప్రార్థించాను. ఆంధ్రప్రదేశ్ దేశంలోనే అత్యుత్తమ రాష్ట్రంగా, భారత్ ప్రపంచంలో అగ్రగామిగా నిలవాలని కోరుకున్నాను" అని తెలిపారు.

ప్రపంచవ్యాప్తంగా ఉన్న కోట్లాది మంది హిందువులకు కలియుగ దైవం శ్రీవేంకటేశ్వరస్వామిపై అపారమైన విశ్వాసం ఉందని చంద్రబాబు అన్నారు. ప్రపంచ వ్యాప్తంగా, దేశ వ్యాప్తంగా ఉన్న హిందువులు ఒక్కసారైనా శ్రీవారిని దర్శించుకోవాలని కోరుకుంటారని.. ఇంతటి ప్రాముఖ్యత కలిగిన ఆలయాన్ని చక్కగా నిర్వహిస్తున్న టీటీడీ పాలకమండలిని, అధికారులను అభినందిస్తున్నానని తెలిపారు. శ్రీవారి దర్శనానికి వచ్చే భక్తులకు ఎలాంటి అసౌకర్యం కలగకుండా చూడాల్సిన బాధ్యత అధికారులపై ఉందని సూచించారు. ఈ గొప్ప సంప్రదాయాన్ని, సంస్కృతిని భావితరాలకు అందించేలా ప్రతి ఒక్కరూ కృషి చేయాలని పిలుపునిచ్చారు.

ఈ కార్యక్రమంలో మంత్రులు నారా లోకేశ్, ఆనం రామనారాయణరెడ్డి, అనగాని సత్యప్రసాద్, టీటీడీ ఛైర్మన్ బీఆర్ నాయుడు, ఈవో ముద్దాడ రవిచంద్ర, ఇతర బోర్డు సభ్యులు పాల్గొన్నారు.