అగార్కర్ భవితవ్యంపై ఉత్కంఠ.. 48 గంటల్లో బీసీసీఐ కీలక నిర్ణయం!

టీమిండియా చీఫ్ సెలెక్టర్ అజిత్ అగార్కర్ భవితవ్యంపై నెలకొన్న సందిగ్ధతకు మరో 48 గంటల్లో తెరపడే అవకాశం ఉంది. అక్టోబర్ 4తో ముగియనున్న ఆయన కాంట్రాక్ట్‌ను పొడిగించే విషయంపై బీసీసీఐ ఉన్నతాధికారులు కీలక నిర్ణయం తీసుకోనున్నారు. కాంట్రాక్ట్ పొడిగింపుపై చర్చించేందుకు అగార్కర్, బీసీసీఐ ఆఫీస్ బేరర్లు రాబోయే రెండు రోజుల్లో సమావేశం కానున్నారని తెలుస్తోంది.

అగార్కర్ 2023 జులై 4న చీఫ్ సెలెక్టర్‌గా బాధ్యతలు స్వీకరించాడు. అత‌ని హయాంలో భారత జట్టు అద్భుతమైన విజయాలు సాధించింది. 2024, 2026 టీ20 ప్రపంచకప్‌లతో పాటు 2025 ఛాంపియన్స్ ట్రోఫీని కూడా గెలుచుకుంది. ఇదే సమయంలో విరాట్ కోహ్లీ, రోహిత్ శర్మ, రవిచంద్రన్ అశ్విన్ వంటి దిగ్గజ ఆటగాళ్లు కొన్ని ఫార్మాట్లకు, అంతర్జాతీయ క్రికెట్‌కు వీడ్కోలు పలికారు. వాస్తవానికి అగార్కర్ కాంట్రాక్ట్ ఈ ఏడాది జూన్‌తోనే ముగియాల్సి ఉండగా, బోర్డు మూడు నెలల పాటు పొడిగించింది.

అయితే, గత రెండు నెలలుగా బీసీసీఐ ఆఫీస్ బేరర్లు, సెలక్షన్ కమిటీ మధ్య ప్రచ్ఛన్న యుద్ధం నడుస్తోందని కథనాలు వస్తున్నాయి. ఈ నెల 3న జరిగిన బీసీసీఐ పనితీరు సమీక్షా సమావేశానికి అగార్కర్ గైర్హాజరు కావడం ఈ ఊహాగానాలకు మరింత బలం చేకూర్చింది. 'స్పోర్ట్‌స్టార్' కథనం ప్రకారం.. కాంట్రాక్ట్ పొడిగింపునకు ఇరు పక్షాలు సానుకూలంగానే ఉన్నాయని, కొన్ని చిన్న సమస్యలను పరిష్కరించుకోవాల్సి ఉందని ఓ బీసీసీఐ అధికారి వెల్లడించారు.

ప్రస్తుతం అగార్కర్ కాంట్రాక్ట్ అక్టోబర్ 4తో ముగియనుంది. సెప్టెంబర్ 16న జరిగే సెలక్షన్ కమిటీ సమావేశం ఆయనకు చివరిది కావొచ్చని భావిస్తున్నారు. ఈ సమావేశంలో వెస్టిండీస్‌తో జరగబోయే మూడు వన్డేల సిరీస్‌కు, అలాగే ఇరానీ కప్ జట్టును ఎంపిక చేయనున్నారు. సెప్టెంబర్ 27 నుంచి ప్రారంభమయ్యే ఈ వన్డే సిరీస్‌కు శుభ్‌మన్ గిల్ కెప్టెన్‌గా వ్యవహరించనుండగా, సీనియర్ ఆటగాడు కేఎల్ రాహుల్‌ను వైస్ కెప్టెన్‌గా నియమించే అవకాశం ఉంది. ఏదేమైనా అగార్కర్ పదవిపై బీసీసీఐ అధికారికంగా ఎలాంటి ప్రకటన చేయకపోవడంతో ఉత్కంఠ కొనసాగుతోంది.