'సీన్'.. మరోసారి పవర్ ఫుల్ పోలీసాఫీసర్‌గా సూర్య

కోలీవుడ్ స్టార్ హీరో సూర్య, దర్శకుడు జితూ మాధవన్ కాంబినేషన్‌లో ఎంతో ఆసక్తిగా ఎదురుచూస్తున్న చిత్రానికి సంబంధించిన కీలక అప్‌డేట్ వచ్చేసింది. బుధవారం ఈ సినిమా టైటిల్‌ను అధికారికంగా ప్రకటించారు. ఈ చిత్రానికి 'సీన్' అనే పేరును ఖరారు చేస్తూ, ఈ ఏడాది దీపావళి కానుకగా నవంబర్ 6న ప్రపంచవ్యాప్తంగా విడుదల చేయనున్నట్లు మేకర్స్ తెలిపారు.

ఈ సందర్భంగా విడుదల చేసిన టైటిల్ అనౌన్స్‌మెంట్ టీజర్ సినిమాపై అంచనాలను భారీగా పెంచుతోంది. "అతని నీచమైన స్వభావాన్ని దాచిపెట్టడానికి మీరంతా అతని ప్రతిభను ప్రదర్శిస్తున్నారు" అనే వాయిస్ ఓవర్‌తో టీజర్ ప్రారంభమవుతుంది. ఆ తర్వాత పోలీస్ గెటప్‌లో సూర్య ఒక క్రైమ్ సీన్‌లోకి ఎంట్రీ ఇస్తాడు. "ఎవరు ఎవర్ని చంపారు?" అని ఆయన అడగ్గా, "అది కనుక్కోవడానికే కదా మీరు వచ్చింది" అని ఓ కానిస్టేబుల్ సమాధానమిస్తాడు. 

ఈ చిత్రంలో సూర్య 'డీఎస్పీ ఇన్బరాజ్' అనే పవర్‌ఫుల్ పోలీస్ పాత్రలో నటిస్తున్నారు. "సందేహితులు ఇన్బరాజ్ సార్‌ను చూస్తే చాలు, వింతగా ప్రవర్తించడం మొదలుపెడతారు" అని జైల్ వార్డెన్ చెప్పడం, "ఇన్బరాజ్ సార్ వస్తున్నారు, ఎవరూ బయటకు రావొద్దు" అని ఖైదీలను హెచ్చరించడం వంటి సన్నివేశాలు పాత్ర తీవ్రతను తెలియజేస్తున్నాయి. "నా ముఖం బాగా చూసుకో. నీకు, నిన్ను అరెస్ట్ చేసిన ఒకే ఒక్క పోలీస్‌ను నేనే కావచ్చు.. కానీ నాకు, నేను జైల్లో పెట్టిన 900 మంది నేరస్థుల్లో నువ్వొకడివి" అంటూ సూర్య చెప్పే డైలాగ్ హైలైట్‌గా నిలిచింది.

ఈ సినిమా టైటిల్‌ను ప్రకటిస్తూ సూర్య తన 'ఎక్స్' ఖాతాలో, "అందరికీ నమస్కారం, ఇదిగో 'సీన్' నుంచి చిన్న గ్లింప్స్. నవంబర్ 6 నుంచి థియేటర్లలో. #Deepavali2026" అని పోస్ట్ చేశారు.

ఇప్పటివరకు 'సూర్య 47'గా పిలవబడిన ఈ సినిమాను జఘరం స్టూడియోస్ నిర్మిస్తోంది. గత ఏడాది డిసెంబర్‌లో ఈ ప్రాజెక్ట్ పూజా కార్యక్రమాలతో ప్రారంభమైంది. ఇందులో సూర్య సరసన నజ్రియా నజీమ్ హీరోయిన్‌గా నటిస్తుండగా, యువ నటుడు నస్లెన్ కీలక పాత్ర పోషిస్తున్నారు. జాన్ విజయ్, ఆనందరాజ్ తదితరులు ఇతర ముఖ్య పాత్రల్లో కనిపించనున్నారు. ఈ చిత్రానికి సుషిన్ శ్యామ్ సంగీతం అందిస్తుండగా, వినీత్ ఆగస్టియన్ సినిమాటోగ్రఫీ బాధ్యతలు నిర్వర్తిస్తున్నారు. జితూ మాధవన్ - సూర్య కాంబినేషన్ ప్రకటన వచ్చినప్పటి నుంచి ఈ సినిమాపై భారీ అంచనాలు నెలకొన్నాయి. సూర్య గతంలో సింగం సిరీస్ సినిమాల్లో శక్తిమంతమైన పోలీస్ అధికారిగా కనిపించడం తెలిసిందే.