ఉత్తర బంగాళాఖాతంలో అల్పపీడనం.. ఉత్తరాంధ్రలో మూడు రోజులు వర్షాలు

ఆంధ్రప్రదేశ్ రాష్ట్రంలో పలు ప్రాంతాల్లో వర్షాలు కురిసే అవకాశం ఉందని రాష్ట్ర విపత్తుల నిర్వహణ సంస్థ (ఏపీఎస్డీఎంఏ) వెల్లడించింది. ఉత్తర బంగాళాఖాతంలో రేపు (గురువారం) అల్పపీడనం ఏర్పడనుందని, దీని ప్రభావంతో రానున్న మూడు రోజుల పాటు రాష్ట్రంలో, ముఖ్యంగా ఉత్తరాంధ్ర జిల్లాల్లో వర్షాలు కురుస్తాయని తెలిపింది. ప్రజలు అప్రమత్తంగా ఉండాలని, వాతావరణ మార్పులను గమనిస్తూ తగిన జాగ్రత్తలు తీసుకోవాలని సూచించింది.

ఈ అల్పపీడన ప్రభావంతో తేలికపాటి నుంచి మోస్తరు వర్షాలతో పాటు, కొన్ని చోట్ల ఉరుములు, మెరుపులతో కూడిన వర్షాలు, గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉందని అధికారులు తెలిపారు. వర్షం కురుస్తున్నప్పుడు, ముఖ్యంగా ఉరుములు, పిడుగులు పడే సమయంలో ప్రజలు సురక్షిత ప్రాంతాల్లో ఉండాలని హెచ్చరించారు. చెట్ల కింద, భారీ హోర్డింగుల వద్ద, శిథిలమైన నిర్మాణాల దగ్గర నిలబడటం ప్రమాదకరమని స్పష్టం చేశారు.

వివిధ జిల్లాల్లో వర్ష సూచన వివరాలు:

గురువారం: శ్రీకాకుళం, పార్వతీపురం మన్యం, అల్లూరి సీతారామరాజు, పోలవరం, కాకినాడ, డాక్టర్ బీఆర్ అంబేద్కర్ కోనసీమ, తూర్పుగోదావరి, తిరుపతి జిల్లాల్లో పిడుగులతో కూడిన తేలికపాటి నుంచి మోస్తరు వర్షాలు పడే అవకాశం ఉంది.

శుక్రవారం: ఉత్తరాంధ్ర జిల్లాలతో పాటు కాకినాడ, కోనసీమ జిల్లాల్లో పిడుగులతో కూడిన మోస్తరు వర్షాలు కురుస్తాయి. మిగిలిన జిల్లాల్లో చెదురుమదురుగా తేలికపాటి జల్లులు పడొచ్చని అంచనా వేస్తున్నారు.

శనివారం: విజయనగరం, పార్వతీపురం మన్యం, అల్లూరి సీతారామరాజు, పోలవరం, అనకాపల్లి, కాకినాడ జిల్లాల్లో తేలికపాటి నుంచి మోస్తరు వర్షాలు కురిసే సూచనలున్నాయని విపత్తుల శాఖ పేర్కొంది.

ఈ అల్పపీడన కదలికలను, వాతావరణ మార్పులను అధికారులు నిశితంగా గమనిస్తున్నారు. మత్స్యకారులు సముద్రంలోకి వెళ్లేటప్పుడు తగిన జాగ్రత్తలు తీసుకోవాలని, లోతట్టు ప్రాంతాల ప్రజలు అప్రమత్తంగా ఉండాలని సూచించారు.