ఆయుష్ విద్యార్థులకు తెలంగాణ సర్కారు శుభవార్త.. భారీగా పెరిగిన స్టైఫండ్

తెలంగాణలో ఆయుష్ వైద్య విద్యను అభ్యసిస్తున్న విద్యార్థులకు రాష్ట్ర ప్రభుత్వం తీపికబురు అందించింది. వారి స్టైఫండ్‌లను భారీగా పెంచుతూ కీలక నిర్ణయం తీసుకుంది. ఆయుర్వేద, హోమియోపతి, యునాని, నాచురోపతి విభాగాల్లోని హౌస్ సర్జన్లు, పీజీ విద్యార్థుల స్టైఫండ్‌లను అల్లోపతి వైద్య విద్యార్థులతో సమాన స్థాయికి పెంచుతూ బుధవారం ఉత్తర్వులు జారీ చేసింది.

ఈ నిర్ణయంతో హౌస్ సర్జన్ల నెలవారీ స్టైఫండ్ రూ. 13,754 నుంచి రూ. 29,792కు పెరిగింది. అదేవిధంగా, పీజీ విద్యార్థుల స్టైఫండ్ రూ. 34,385 నుంచి ఏకంగా రూ. 74,482కు పెరిగింది. తమ చిరకాల డిమాండ్‌ను నెరవేర్చినందుకు కృతజ్ఞతలు తెలిపేందుకు ఆయుష్ విద్యార్థులు, వైద్యులు బుధవారం సచివాలయంలో ఆరోగ్య శాఖ మంత్రి దామోదర రాజనర్సింహను కలిసి పుష్పగుచ్ఛం అందజేశారు.

గత పదేళ్లలో గత ప్రభుత్వం తమ స్టైఫండ్‌లను ఒక్కసారి కూడా పెంచలేదని, దీనివల్ల తీవ్ర ఆర్థిక ఇబ్బందులు ఎదుర్కొన్నామని ఈ సందర్భంగా విద్యార్థులు మంత్రి దృష్టికి తెచ్చారు. తమ సమస్యను అర్థం చేసుకుని, అల్లోపతి విద్యార్థులతో సమానంగా స్టైఫండ్ పెంచిన ముఖ్యమంత్రి రేవంత్ రెడ్డికి, ఆరోగ్య మంత్రికి వారు ప్రత్యేక కృతజ్ఞతలు తెలిపారు.

ఈ సందర్భంగా మంత్రి దామోదర రాజనర్సింహ విద్యార్థులను అభినందించారు. భవిష్యత్తులో మంచి వైద్యులుగా రాణించి ప్రజలకు నాణ్యమైన సేవలు అందించాలని ఆయన ఆకాంక్షించారు. గత రెండున్నరేళ్లుగా రాష్ట్రంలో ఆయుష్ వ్యవస్థను బలోపేతం చేసేందుకు ప్రభుత్వం అనేక చర్యలు తీసుకుంటోందని వివరించారు. సుమారు 700 మంది యోగా ఇన్‌స్ట్రక్టర్లను నియమించామని, 138 మంది అసిస్టెంట్ ప్రొఫెసర్ల నియామకం చేపట్టామని తెలిపారు. సిద్దిపేట, జయశంకర్ భూపాలపల్లి, వికారాబాద్‌లలో 50 పడకల సమీకృత ఆయుష్ ఆసుపత్రులను ఏర్పాటు చేశామని, కరీంనగర్‌లో రూ. 15 కోట్లతో మరో ఆసుపత్రి నిర్మాణ పనులు ప్రారంభమయ్యాయని పేర్కొన్నారు.

సాంప్రదాయ వైద్య పరిజ్ఞానాన్ని ఆధునిక పద్ధతులతో అనుసంధానిస్తూ పరిశోధనల వైపు దృష్టి సారించాలని మంత్రి విద్యార్థులకు సూచించారు. ముఖ్యంగా పేద, గ్రామీణ ప్రజలకు సేవ చేయడమే లక్ష్యంగా పెట్టుకోవాలని పిలుపునిచ్చారు. దశలవారీగా రాష్ట్రంలోని అన్ని ఆయుష్ ఆసుపత్రులను, క్లినిక్‌లను అప్‌గ్రేడ్ చేస్తామని హామీ ఇచ్చారు.