వర్సిటీకి రూ.189 కోట్ల విరాళం.. అమెరికాలో భారత సంతతి దంపతుల పేరుతో ఏఐ కాలేజ్

అమెరికాలో స్థిరపడిన భారత సంతతి దంపతులు తమ ఉదారతను చాటుకున్నారు. తాము చదువుకున్న యూనివర్సిటీ అభివృద్ధికి ఏకంగా 20 మిలియన్ డాలర్లు (సుమారు రూ.189 కోట్లు) భారీ విరాళంగా అందించి అందరి మన్ననలు పొందుతున్నారు. ఈ విరాళానికి గుర్తింపుగా నార్త్ టెక్సాస్ యూనివర్సిటీ (యూఎన్‌టీ) తమ కొత్తగా ఏర్పాటు చేయబోయే ఆర్టిఫిషియల్ ఇంటెలిజెన్స్ కాలేజీకి ఆ దంపతుల పేరు పెట్టాలని నిర్ణయించింది. ఈ విషయాన్ని యూనివర్సిటీ అధికారికంగా ప్రకటించింది.

వివరాల్లోకి వెళితే.. భారత సంతతికి చెందిన అనురాధ, వికాస్ సిన్హా దంపతులు నార్త్ టెక్సాస్ యూనివర్సిటీకి 20 మిలియన్ డాలర్లు విరాళంగా ఇచ్చారు. దీంతో యూనివర్సిటీ ప్రాంగణంలో 'ది అనురాధ అండ్ వికాస్ సిన్హా కాలేజ్ ఆఫ్ ఆర్టిఫిషియల్ ఇంటెలిజెన్స్ అండ్ అడ్వాన్స్‌డ్ అనలిటిక్స్'ను ఏర్పాటు చేయనున్నారు. ఆర్టిఫిషియల్ ఇంటెలిజెన్స్ (ఏఐ), ఇంటెలిజెంట్ సిస్టమ్స్, డేటా అనలిటిక్స్ వంటి ఆధునిక సాంకేతికతల అభివృద్ధి, వాటి బాధ్యతాయుతమైన వినియోగంపై ఈ కాలేజ్ ప్రధానంగా దృష్టి సారిస్తుంది.

ఈ భారీ విరాళంతో ఆరు శాశ్వత ఎండోమెంట్‌లను ఏర్పాటు చేయనున్నారు. వీటి ద్వారా కాలేజ్ నాయకత్వం, విద్యార్థులకు స్కాలర్‌షిప్‌లు, ప్రొఫెసర్‌షిప్‌లు, పరిశోధనలు, ఆవిష్కరణలు, కొత్త టెక్నాలజీల అభివృద్ధికి నిధులను కేటాయిస్తారు. ఈ కాలేజీలో ఆర్టిఫిషియల్ ఇంటెలిజెన్స్, సైబర్‌సెక్యూరిటీ, డేటా సైన్స్, హెల్త్ ఇన్ఫర్మాటిక్స్, లైబ్రరీ సైన్స్ వంటి పలు కీలక ప్రోగ్రామ్‌లను ఒకే గొడుగు కిందకు తీసుకువస్తారు.

ఈ సందర్భంగా వికాస్ సిన్హా మాట్లాడుతూ.. "విద్య మా జీవితంలో ఎన్నో అవకాశాలకు తలుపులు తెరిచింది. ఆ అవకాశాలను ఇతరులకు కూడా అందించాలనేదే మా లక్ష్యం. ఈ విరాళాన్ని భవిష్యత్ విద్యార్థుల నైపుణ్యాలు, వారి విజయాల కోసం పెట్టిన పెట్టుబడిగా భావిస్తున్నాం. ఈ కాలేజ్ కేవలం ఏఐని ఎలా ఉపయోగించాలో నేర్పడమే కాదు, దానిని ఎలా నిర్మించాలి, అర్థం చేసుకోవాలి, నియంత్రించాలి, బాధ్యతాయుతంగా ఎలా వాడాలి అనే అంశాలపై విద్యార్థులకు శిక్షణ ఇస్తుంది" అని వివరించారు. వలస వచ్చిన వారు అమెరికన్ కలను సాకారం చేసుకోవడమే కాకుండా ఆ కలను నిర్మించడంలోనూ భాగస్వాములవుతారని ఆయన పేర్కొన్నారు.

భారత్‌లోని శ్రీ వెంకటేశ్వర యూనివర్సిటీ నుంచి సివిల్ ఇంజినీరింగ్‌లో బ్యాచిలర్ డిగ్రీలు పూర్తి చేసిన అనురాధ, వికాస్ సిన్హా దంపతులు ఉన్నత చదువుల కోసం అమెరికా వెళ్లారు. వికాస్ సిన్హా 2023లో ఇదే నార్త్ టెక్సాస్ యూనివర్సిటీ నుంచి ఇన్ఫర్మేషన్ సైన్స్‌లో పీహెచ్‌డీ పట్టా పొందారు. ప్రస్తుతం ఆయన బ్రాడ్‌కామ్ కంపెనీలో మెయిన్‌ఫ్రేమ్ సాఫ్ట్‌వేర్ విభాగానికి వైస్ ప్రెసిడెంట్‌గా పనిచేస్తున్నారు. 

సిన్హా దంపతులు గతంలో 2024, 2025 సంవత్సరాల్లో కూడా డేటా సైన్స్ విభాగం, ఇన్నోవేషన్ ల్యాబ్ ఏర్పాటు కోసం యూఎన్‌టీకి భారీ విరాళాలు అందించారు. డెంటన్‌లో ఉన్న ఈ యూనివర్సిటీ 1890లో స్థాపించబడిన ఒక ప్రముఖ ప్రభుత్వ పరిశోధనా విశ్వవిద్యాలయం.