రక్షించబోతే దాడి.. మత్తు ఇంజెక్షన్ పనిచేయక అటవీ అధికారిపైకి దూకిన చిరుత

కర్ణాటకలోని దావణగెరె జిల్లాలో గాయపడిన ఓ చిరుతపులి అటవీశాఖ అధికారిపై దాడికి దిగింది. రోడ్డు ప్రమాదానికి గురైన చిరుతను రక్షించే క్రమంలో ఈ అనూహ్య ఘటన చోటుచేసుకుంది. దీనికి సంబంధించిన వీడియో ప్రస్తుతం సామాజిక మాధ్యమాల్లో వైరల్‌గా మారింది.

వివరాల్లోకి వెళితే, దావణగెరె పరిధిలోని ఒక రహదారిపై కారు ఢీకొనడంతో ఓ చిరుత గాయపడింది. సమాచారం అందుకున్న అటవీశాఖ సిబ్బంది వెంటనే అక్కడికి చేరుకుని, దానికి చికిత్స అందించేందుకు పట్టుకునే ప్రయత్నం చేశారు. ఇందులో భాగంగా చిరుతకు మత్తు ఇంజెక్షన్ ఇచ్చారు. అయితే, ఆ మందు ప్రభావం పూర్తిగా చూపకముందే సిబ్బంది దాన్ని తరలించేందుకు యత్నించారు.

ఊహించని విధంగా ఆ చిరుత ఒక్కసారిగా ఒక అధికారిపైకి లంఘించింది. ఈ క్రమంలో ఆయన కిందపడిపోగా, వెంటనే అప్రమత్తమైన ఇతర సిబ్బంది కర్రలతో చిరుత దృష్టిని మరల్చారు. దీంతో ఆ అధికారి క్షేమంగా బయటపడగలిగారు. దాడి అనంతరం ఆ చిరుత రోడ్డు పక్కన ఉన్న పొదల్లోకి వెళ్లిపోయింది.

ఆ తర్వాత అటవీ సిబ్బంది ఎంతో చాకచక్యంగా వ్యవహరించి చిరుతను బంధించారు. ప్రస్తుతం దానికి పశువైద్యశాలలో చికిత్స అందిస్తున్నారు. రోడ్డు ప్రమాదంలో తగిలిన గాయాలకు మెరుగైన వైద్యం అందిస్తున్నట్లు అధికారులు వెల్లడించారు.