రాణిలా బతికింది: నటి అనన్య రాజ్‌కు పరిశ్రమ కన్నీటి నివాళి

నటి అనన్య రాజ్ (27) అకాల మృతిపై  ఆల్ ఇండియన్ సినీ వర్కర్స్ అసోసియేషన్ (ఏఐసీడబ్ల్యూఏ) తీవ్ర సంతాపం వ్యక్తం చేస్తూ భావోద్వేగ ప్రకటన విడుదల చేసింది. "కేవలం 27 ఏళ్ల వయసులో అనన్య రాజ్ మనందరినీ విడిచివెళ్లడం అత్యంత బాధాకరం. గడిచిన ఏడాది కాలంగా ఆమె అనేక శారీరక, మానసిక సవాళ్లను ఎదుర్కొన్నారు. అయినప్పటికీ, ఆమె ఒక యోధురాలిలా పోరాడారు, ఒక రాణిలా బతికారు. ఆమె జ్ఞాపకాలు ఎప్పటికీ మాతోనే ఉంటాయి" అని అసోసియేషన్ నివాళులర్పించింది. ఈ మాటలు అనన్య జీవిత పోరాటానికి, ఆమె దృఢ సంకల్పానికి అద్దం పడుతున్నాయని పలువురు వ్యాఖ్యానించారు.

కుటుంబ సభ్యులు ఆమె ఇన్‌స్టాగ్రామ్ ఖాతాలో పంచుకున్న సందేశం అందరినీ కంటతడి పెట్టించింది. "బచ్చా.. నీవు లేని లోటు స్పష్టంగా తెలుస్తోంది. ఏడాది పాటు నువ్వు చూపిన ధైర్యం, పోరాటపటిమ మరువలేనివి. ఆమె ఆత్మకు శాంతి చేకూరాలని ప్రతి ఒక్కరూ ప్రార్థించండి" అని పేర్కొన్నారు.

హిందీలో '7 అవర్స్ టు గో', 'ది ఫైనల్ ఎగ్జిట్', 'ఘోస్ట్' వంటి చిత్రాలతో అనన్య తనకంటూ ఒక గుర్తింపు తెచ్చుకున్నారు. తెలుగులో నవీన్ చంద్ర హీరోగా, శ్రీనివాస్ రాజు దర్శకత్వంలో వచ్చిన సస్పెన్స్ థ్రిల్లర్ 'తగ్గేదే లే' (2022)లో ఆమె పోషించిన పాత్రకు మంచి మార్కులు పడ్డాయి. దీనితో పాటు 'మద్రాసీ గ్యాంగ్' అనే త్రిభాషా చిత్రంలోనూ ఆమె నటించారు. ఇంత చిన్న వయసులో, ఎంతో భవిష్యత్తు ఉన్న నటిని కోల్పోవడం పరిశ్రమకు తీరని లోటని సహనటులు, దర్శకులు సంతాపం తెలుపుతున్నారు. ఆమె ఆత్మకు శాంతి కలగాలని ప్రార్థిస్తున్నారు.