ఇంటింటికీ తెలుగుదేశం: 17 రోజుల్లో 50 లక్షల ఇళ్ల సందర్శన.. శ్రేణులకు లోకేశ్ అభినందనలు

తెలుగుదేశం పార్టీ ప్రతిష్ఠాత్మకంగా చేపట్టిన 'ఇంటింటికీ తెలుగుదేశం – 2 ఏళ్ల నమ్మకం – అభివృద్ధి, సంక్షేమం' కార్యక్రమం ఒక కీలక మైలురాయిని అధిగమించింది. కూటమి ప్రభుత్వం అధికారంలోకి వచ్చి రెండేళ్లు పూర్తయిన సందర్భంగా చేపట్టిన ఈ కార్యక్రమం, కేవలం 17 రోజుల్లోనే 50 లక్షల ఇళ్ల సందర్శన మార్క్‌ను దాటింది. ప్రభుత్వ విజయాలను ప్రజలకు నేరుగా చేరవేసే లక్ష్యంతో ఈ కార్యక్రమం రాష్ట్రవ్యాప్తంగా కొనసాగుతోంది.

మంగళవారం నాటికి 17 రోజులు పూర్తి చేసుకున్న ఈ కార్యక్రమం ద్వారా టీడీపీ శ్రేణులు మొత్తం 50.62 లక్షల ఇళ్లను సందర్శించాయి. పార్టీ నాయకులు, కార్యకర్తలు సగటున ప్రతిరోజూ మూడు లక్షలకు పైగా కుటుంబాలను కలుస్తున్నారు. 17వ రోజైన మంగళవారం ఒక్కరోజే 3.12 లక్షల ఇళ్లను సందర్శించారు. ఈ సందర్భంగా, ఎన్నికల సమయంలో ఇచ్చిన ‘సూపర్ సిక్స్’ హామీల అమలు తీరు, రైతులు, మహిళలు, యువతకు ప్రభుత్వం అందిస్తున్న సంక్షేమ ఫలాలు, అభివృద్ధి కార్యక్రమాల గురించి ప్రజలకు వివరిస్తున్నారు. ప్రభుత్వ పథకాలను వివరించడంతో పాటు, క్షేత్రస్థాయిలో ప్రజల నుంచి అభిప్రాయాలు, స్థానిక సమస్యలను కూడా స్వీకరించి, వాటిని ప్రజాప్రతినిధుల దృష్టికి తీసుకెళ్తున్నారు.

50 లక్షల ఇళ్ల సందర్శన మైలురాయిని అధిగమించడంపై టీడీపీ వర్కింగ్ ప్రెసిడెంట్, మంత్రి నారా లోకేశ్ పార్టీ శ్రేణులకు అభినందనలు తెలిపారు. ఇంత భారీ స్థాయిలో ప్రజలతో మమేకమవుతున్న నాయకులు, కార్యకర్తల కృషిని ఆయన ప్రశంసించారు. అదే సమయంలో, కార్యక్రమం నెమ్మదిగా సాగుతున్న నియోజకవర్గాలపై ఆయన ప్రత్యేకంగా సమీక్ష నిర్వహించారు. 25 వేల కంటే తక్కువ సందర్శనలు నమోదైన నియోజకవర్గాలు, సుమారు 4,220 బూత్‌ల పనితీరును పరిశీలించినట్లు సమాచారం. 50 లక్షల మైలురాయి స్ఫూర్తితో కార్యక్రమాన్ని మరింత వేగవంతం చేయాలని లోకేశ్ పార్టీ శ్రేణులకు దిశానిర్దేశం చేశారు.