రజనీకాంత్ అర్ధాంగి కొత్త ఉద్యమం.. 'మక్కల్ మేడై' వెబ్‌సైట్ ప్రారంభం

ప్రముఖ సినీ నిర్మాత, విద్యావేత్త, సూపర్ స్టార్ రజినీకాంత్ సతీమణి లతా రజినీకాంత్ శుక్రవారం ఒక కొత్త సామాజిక ఉద్యమానికి శ్రీకారం చుట్టారు. 'భారత్ సేవ', శ్రీ దయా ఫౌండేషన్ ఆధ్వర్యంలో 'మక్కల్ మేడై' పేరుతో రూపొందించిన వెబ్‌సైట్‌ను ఆమె అధికారికంగా ప్రారంభించారు. భారతదేశ ఘనమైన గతాన్ని, సంస్కృతిని పరిరక్షించడమే లక్ష్యంగా ఈ పౌర భాగస్వామ్య ఉద్యమాన్ని ప్రారంభించినట్లు ఆమె తెలిపారు.

ఈ సందర్భంగా లతా రజినీకాంత్ మాట్లాడుతూ, "ఏళ్ల తరబడి సామాజిక రంగంలో అనేక అంశాలపై పనిచేసిన అనుభవంతో, ఇప్పుడు 'భారత్ సేవ మక్కల్ మేడై' వెబ్‌సైట్‌ను ప్రారంభిస్తున్నాం. మా లోగో, బ్యానర్లు, సభ్యత్వ కార్డులను కూడా ఆవిష్కరించడం సంతోషంగా ఉంది" అని అన్నారు. ఇది ప్రజల ఉద్యమమని, దేశ సంక్షేమం కోసం ప్రజలందరూ 'భారత్ సేవ'లో చేరాలని ఆమె విజ్ఞప్తి చేశారు. "ప్రజలందరూ తమ ఆలోచనలను, చేతలను ఏకం చేసి దేశభక్తిని పెంపొందించాలి. మన దేశ చరిత్రను, దాని కోసం ప్రాణత్యాగం చేసిన మహనీయుల ఆశయాలను నిలబెట్టాలి" అని ఆమె పిలుపునిచ్చారు.

ఈ వెబ్‌సైట్ ప్రధాన ఉద్దేశం దేశ ప్రజల ఆలోచనలను, సంస్కృతిని పరిరక్షించడం, దేశ ఉమ్మడి ప్రయోజనాల కోసం అందరినీ ఒకేతాటిపైకి తీసుకురావడమని లతా రజినీకాంత్ వివరించారు. "భారత్ సేవ అనేది ఒక జాతీయ ఉద్యమం. ఇందులో భాగంగా తమిళనాడులో 'మక్కల్ మేడై' నమూనాను అమలు చేస్తున్నాం. ప్రతి జిల్లా, గ్రామంలో సభలు ఏర్పాటు చేసి, ప్రభుత్వ సంక్షేమ కార్యక్రమాలు గ్రామాల్లోని చివరి పౌరుడికి కూడా చేరేలా చూస్తాం" అని ఆమె స్పష్టం చేశారు.

గ్రామీణ ప్రాంతాల్లో ఉద్యమ ప్రభావంపై మాట్లాడుతూ.. రైతులు, వ్యవసాయ ఆధారిత పరిశ్రమలు, వ్యాపారుల సంక్షేమానికి అధిక ప్రాధాన్యత ఇస్తామని తెలిపారు. అంతేకాకుండా, భారతదేశ ప్రాచీన చరిత్ర, సంస్కృతి, వారసత్వం గురించి యువత తప్పనిసరిగా తెలుసుకోవాలని ఆమె సూచించారు. "మన దేశ సంస్కృతిని కాపాడటానికి ఎందరో మహానుభావులు తమ జీవితాలను త్యాగం చేశారు. నేడు మనం అనుభవిస్తున్న వైభవానికి ప్రాచీన రాజులు చేసిన సేవలను, వారి గొప్పతనాన్ని యువత అర్థం చేసుకోవాలి" అని ఆమె పేర్కొన్నారు.