ఎర్ర సముద్రంలో దిగ్బంధనం.. హౌతీలపై భారీ ఆపరేషన్‌కు సౌదీ ప్లాన్

పశ్చిమాసియాలో ఉద్రిక్తతలు మరోసారి భగ్గుమన్నాయి. యెమెన్‌లోని హౌతీ తిరుగుబాటుదారులపై సముద్ర, భూమార్గాల ద్వారా భారీ సైనిక చర్యకు సౌదీ అరేబియా సిద్ధమవుతున్నట్లు అంతర్జాతీయ కథనాలు వెలువడుతున్నాయి. ఎర్ర సముద్రంలో తమ చమురు ఎగుమతి నౌకలపై హౌతీలు విధించిన దిగ్బంధనాన్ని ఛేదించడమే ఈ ఆపరేషన్ ప్రధాన లక్ష్యంగా కనిపిస్తోంది.

ఈ సైనిక చర్యలో భాగంగా, సౌదీ తన బలగాలను తూర్పు యెమెన్ నుంచి ఉపసంహరించి, మధ్య యెమెన్‌లో భూతల దాడికి మోహరిస్తున్నట్లు సమాచారం. మరోవైపు, ఎర్ర సముద్రం, బాబ్ అల్-మందబ్ జలసంధిలో నౌకల రక్షణ కోసం సౌదీ అరేబియా ఒక బహుళజాతి నౌకాదళ కూటమిని కూడా ఏర్పాటు చేస్తోంది. ఈ కూటమికి టర్కీ, పాకిస్థాన్, ఈజిప్ట్, సూడాన్‌ సహా 14 దేశాలు మద్దతు తెలిపాయని సౌదీ రక్షణ మంత్రిత్వ శాఖ ప్రకటించింది. ఈ కూటమిలో చేరాలని అమెరికా, బ్రిటన్, ఫ్రాన్స్, జర్మనీ వంటి పశ్చిమ దేశాలను కూడా సౌదీ కోరింది.

యెమెన్ రాజధాని సనాతో పాటు ఎర్ర సముద్ర తీరాన్ని నియంత్రణలో ఉంచుకున్న ఇరాన్ మద్దతుగల హౌతీలు జులై 20న సౌదీ నౌకలపై దిగ్బంధనం విధిస్తున్నట్లు ప్రకటించారు. తమ దేశంపై సౌదీ విధించిన దిగ్బంధనాన్ని ఎత్తివేస్తేనే తాము వెనక్కి తగ్గుతామని హౌతీలు స్పష్టం చేస్తున్నారు. జులై 25న సౌదీలోని కీలక చమురు రవాణా కేంద్రాలపై దాడి చేశామని కూడా వారు ప్రకటించడం ఉద్రిక్తతలను మరింత పెంచింది.

హర్మూజ్ జలసంధి మార్గం ఇప్పటికే సమస్యాత్మకంగా మారడంతో సౌదీకి ఎర్ర సముద్ర మార్గం చమురు ఎగుమతులకు అత్యంత కీలకంగా మారింది. ప్రస్తుతం సౌదీ చమురు ఎగుమతుల్లో సగానికి పైగా యాన్బు పోర్టు నుంచే జరుగుతున్నాయి. ఈ మార్గాన్ని కూడా హౌతీలు అడ్డుకుంటే సౌదీ ఆర్థిక వ్యవస్థ తీవ్రంగా దెబ్బతినే ప్రమాదం ఉంది.