యువతను బొద్దింకలతో పోల్చిన పాక్ మంత్రి.. ఏకమైతే పెను ప్రమాదమంటూ హెచ్చరిక

పాకిస్థాన్ అంతర్గత వ్యవహారాల శాఖ మంత్రి మోహ్సిన్ నఖ్వీ సంచలన వ్యాఖ్యలు చేశారు. దేశంలో నిరాశా నిస్పృహలతో ఉన్న యువతను 'బొద్దింకలు'గా అభివర్ణిస్తూ, వారంతా ఏకమైతే ప్రస్తుత వ్యవస్థను సమూలంగా కూల్చివేయగలరని ఆయన తీవ్రంగా హెచ్చరించారు. ఇస్లామాబాద్‌లో నిర్వహించిన పాకిస్థాన్ ఎకనామిక్ సమ్మిట్‌లో ఆయన చేసిన ఈ వ్యాఖ్యలు ప్రస్తుతం తీవ్ర కలకలం రేపుతున్నాయి.

ప్రస్తుత పాలనా వ్యవస్థ పూర్తిగా విఫలమైందని, దేశ సమస్యలను పరిష్కరించే సామర్థ్యం దానికి లేదని నఖ్వీ విశ్లేషించారు. "మీరు వారిని యువత అంటారో, బొద్దింకలు అంటారో అది మీ ఇష్టం.. కానీ ఆ బొద్దింకలే ఏకమైతే, వారు వ్యవస్థను పూర్తిగా మార్చివేయగలరు" అని ఆయన వ్యాఖ్యానించారు. తక్షణమే భారీ సంస్కరణలు చేపట్టకపోతే, మరో పదేళ్ల తర్వాత కూడా దేశం ఇవే సమస్యలపై చర్చించుకోవాల్సి వస్తుందని ఆయన ఆవేదన వ్యక్తం చేశారు. ప్రజలు ఉచిత పథకాలను ఆశించడం లేదని, వారికి కావాల్సింది న్యాయం, ప్రతిభ ఆధారిత అవకాశాలు మరియు ఉపాధి మాత్రమేనని స్పష్టం చేశారు. ఇందుకోసం కొత్త పరిపాలనా విభాగాలను ఏర్పాటు చేయడంతో పాటు, స్థానిక ప్రభుత్వాలకు మరిన్ని అధికారాలు కల్పించాలని ఆయన సూచించారు.

అనంతరం విలేకరులతో మాట్లాడుతూ, దేశ సమస్యలను కేవలం సైనిక చర్యల ద్వారా పరిష్కరించలేమని ఆయన అభిప్రాయపడ్డారు. రాజకీయ నాయకత్వం పాలనా వ్యవస్థను సంస్కరించకపోతే, సైన్యాధిపతి పడుతున్న శ్రమ వృథా అవుతుందని పేర్కొన్నారు. ప్రజాస్వామ్యానికి ఎటువంటి ఆటంకం కలగకూడదని, రాజకీయ పార్టీలన్నీ సమన్వయంతో పనిచేయాలని ఆర్మీ చీఫ్ అసిమ్ మునీర్ చెప్పిన విషయాన్ని ఈ సందర్భంగా ఆయన గుర్తుచేశారు. ప్రధాని షెహబాజ్ షరీఫ్ కష్టపడి పనిచేస్తున్నప్పటికీ, అవి కేవలం తాత్కాలిక చర్యలు మాత్రమేనని, వ్యవస్థాగత సంస్కరణలు జరగడం లేదని నఖ్వీ పేర్కొన్నారు.

పాకిస్థాన్ ప్రస్తుతం తీవ్ర ఆర్థిక సంక్షోభం, నిరుద్యోగం, రాజకీయ అనిశ్చితితో పాటు బలూచిస్థాన్, పీఓకే, ఖైబర్ పఖ్తుంఖ్వా వంటి ప్రాంతాల్లో భద్రతాపరమైన సవాళ్లను ఎదుర్కొంటోంది. ఇటువంటి క్లిష్ట పరిస్థితుల్లో ఆ దేశ మంత్రి చేసిన ఈ వ్యాఖ్యలు అత్యంత ప్రాధాన్యత సంతరించుకున్నాయి.