వెండితెరపైకి 'శ్రీమద్ భాగవతం'.. ఏడు భాగాలుగా చిత్రం

ప్రముఖ పౌరాణిక ధారావాహిక 'రామాయణం' సృష్టికర్త రామానంద సాగర్ కుటుంబానికి చెందిన సంస్థ నుంచి మరో భారీ ప్రాజెక్ట్ సిద్ధమవుతోంది. గురుపౌర్ణమి (వ్యాస పౌర్ణమి) పర్వదినాన్ని పురస్కరించుకుని, సాగర్ పిక్చర్స్ ఎంటర్‌టైన్‌మెంట్ సంస్థ 'శ్రీమద్ భాగవతం' పేరుతో ఏడు భాగాల సినిమాటిక్ ఫ్రాంచైజీని ప్రకటించింది. భాగవత మహాపురాణం ఆధారంగా, అత్యంత ప్రామాణిక కథనంతో ఈ చిత్రాలను థియేటర్లలో విడుదల చేయనున్నట్లు వెల్లడించింది.

శతాబ్దాలుగా కొనసాగుతున్న ఏడు రోజుల భాగవత సప్తాహ పారాయణం సంప్రదాయం స్ఫూర్తితో ఈ చిత్రాలను ఏడు భాగాలుగా తీర్చిదిద్దుతున్నారు. దీనికి 'సప్త' అని నామకరణం చేశారు. ఈ ఫ్రాంచైజీలోని ఏడు భాగాలు ఒకదానికొకటి అనుసంధానమై సాగనున్నాయి. ఈ ప్రాజెక్టుకు సంబంధించిన నటీనటులు, దర్శకుడు మరియు ఇతర సాంకేతిక నిపుణుల వివరాలను చిత్రబృందం త్వరలోనే అధికారికంగా ప్రకటించనుంది.