భారత క్రికెట్‌లో సంచలనంగా మారిన 15 ఏళ్ల యువ కెరటం వైభవ్ సూర్యవంశీపై టీమిండియా తాత్కాలిక కోచ్ వీవీఎస్ లక్ష్మణ్ ప్రశంసల వర్షం కురిపించాడు. అదే సమయంలో అతని కెరీర్‌కు అత్యంత కీలకమైన ఒక సలహా కూడా ఇచ్చాడు. జింబాబ్వేతో జరిగిన టీ20 సిరీస్‌లో అద్భుత ప్రదర్శన చేసిన వైభవ్, ఆఖరి మ్యాచ్‌లో 49 బంతుల్లో 81 పరుగులు చేసి జట్టు విజయంలో కీలక పాత్ర పోషించాడు. ఈ ప్రదర్శనకు గాను 'ప్లేయర్ ఆఫ్ ది మ్యాచ్'తో పాటు 'ప్లేయర్ ఆఫ్ ది సిరీస్' అవార్డులను కూడా గెలుచుకున్నాడు.

సిరీస్ ముగిసిన అనంతరం హరారేలో జరిగిన మీడియా సమావేశంలో లక్ష్మణ్ మాట్లాడుతూ వైభవ్ ప్రతిభను, అతని ఎదుగుదలను కొనియాడాడు. "వైభవ్ గురించి మాకు బాగా తెలుసు. సుమారు రెండున్నరేళ్ల క్రితం, 2024 అండర్-19 ప్రపంచకప్‌నకు ముందే అతని ప్రతిభను గుర్తించాం. విజయవాడలో జరిగిన క్వాడ్రాంగులర్ సిరీస్‌లో ఇండియా-బి తరఫున అత్యధిక పరుగులు చేసిన ఆటగాళ్లలో అతనొకడు" అని లక్ష్మణ్ గుర్తుచేశాడు. అప్పటి నుంచి బీసీసీఐ ఆధ్వర్యంలోని సెంటర్ ఆఫ్ ఎక్సలెన్స్ (సీఓఈ) క్యాంపుల్లో వైభవ్ నిరంతరం శిక్షణ పొందుతున్నాడని, అండర్-19 ప్రపంచకప్‌లోనూ టాప్ స్కోరర్‌గా నిలిచాడని తెలిపాడు.

గత ఆరు నెలల్లో ఒక ఆటగాడిగానే కాకుండా వ్యక్తిగా కూడా వైభవ్‌లో వచ్చిన పరిణతి అద్భుతమని లక్ష్మణ్ అన్నాడు. "వైభవ్‌లో వచ్చిన పరిణతి, అవగాహన అసాధారణంగా పెరిగాయి. అందుకే కఠిన పరిస్థితులను సైతం తట్టుకుని, ఒత్తిడిలో మేటి ఆటగాళ్లపై రాణించగలుగుతున్నాడు. అయితే, అతను మెరుగుపరుచుకోవాల్సిన ముఖ్యమైన అంశం అతని ఫిట్‌నెస్. అతని వయసు కేవలం 15 ఏళ్లేనని కూడా మనం గుర్తుంచుకోవాలి" అని లక్ష్మణ్ స్పష్టం చేశాడు.

ఆట పట్ల వైభవ్‌కు ఉన్న అంకితభావాన్ని కూడా లక్ష్మణ్ ప్రత్యేకంగా ప్రస్తావించాడు. "ఆఖరి మ్యాచ్‌లో ఫీల్డింగ్ చేస్తూ గాయపడినా, మైదానంలోనే ఉండాలని అతను కోరుకున్నాడు. కానీ, మా ఫిజియో సూచన మేరకు అతన్ని బయటకు పంపించాల్సి వచ్చింది. జట్టు కోసం ప్రతీ విషయంలోనూ ది బెస్ట్‌ అందించాలనే తపన అతనిలో ఉంది" అని లక్ష్మణ్ పేర్కొన్నాడు. ఈ వ్యాఖ్యలు వైభవ్ ప్రతిభతో పాటు అతని ఫిట్‌నెస్‌పై కూడా యాజమాన్యం దృష్టి సారించిందని స్పష్టం చేస్తున్నాయి.