దుల్కర్ సల్మాన్, పూజా హెగ్డే జంటగా శ్రీ లక్ష్మీ వెంకటేశ్వర సినిమాస్ బ్యానర్‌పై సుధాకర్ చెరుకూరి నిర్మిస్తున్న తాజా చిత్రం ‘శ్రీ శ్రీ’. ఈ సినిమా నుంచి సంగీత ప్రమోషన్లను ప్రారంభించేందుకు చిత్ర యూనిట్ సిద్ధమైంది. ఇందులో భాగంగా, ప్రముఖ సంగీత దర్శకుడు జీవీ ప్రకాశ్ కుమార్ స్వరపరిచిన తొలి సింగిల్ ‘బొమ్మ బొమ్మ’ను జులై 27న సాయంత్రం 5:04 గంటలకు విడుదల చేయనున్నట్లు అధికారికంగా ప్రకటించారు. ఈ మేరకు ఒక ప్రత్యేక పోస్టర్‌ను విడుదల చేశారు.

‘అసంఖ్యాకమైన మధుర జ్ఞాపకాలను తిరిగి గుర్తుచేసే పాట’ అంటూ ఈ గీతంపై చిత్రబృందం ఆసక్తిని పెంచింది. ‘లవ్ విల్ స్పార్క్ అగైన్’ (ప్రేమ మళ్లీ చిగురిస్తుంది) అనే ట్యాగ్‌లైన్‌తో వస్తున్న ఈ సినిమా, ఒక అందమైన ప్రేమకథగా రూపుదిద్దుకుంటున్నట్లు తెలుస్తోంది. ఈ పాటను ప్రముఖ మ్యూజిక్ లేబుల్ ‘సరిగమ సౌత్’ ద్వారా విడుదల చేయనున్నారు.

‘శ్రీ శ్రీ’ చిత్రానికి రవి నేలకూడిటి రచన, దర్శకత్వం వహిస్తున్నారు. ఇషాన్ సక్సేనా సహ నిర్మాతగా వ్యవహరిస్తున్నారు. ఈ చిత్రాన్ని పాన్ ఇండియా స్థాయిలో నిర్మిస్తుండటంతో ‘బొమ్మ బొమ్మ’ పాటను కూడా తెలుగు, తమిళ, మలయాళ, కన్నడ, హిందీ భాషల్లో ఒకేసారి విడుదల చేయనున్నారు.

‘శ్రీ శ్రీ’ చిత్రానికి అనీ ఓం గోస్వామి సినిమాటోగ్రఫీ అందిస్తుండగా, కోటగిరి వెంకటేశ్వరరావు ఎడిటర్‌గా, అవినాష్ కొల్లా ఆర్ట్ డైరెక్టర్‌గా బాధ్యతలు నిర్వర్తిస్తున్నారు. అన్ని కార్యక్రమాలను పూర్తి చేసి, 2026 డిసెంబర్‌లో ఈ సినిమాను ప్రేక్షకుల ముందుకు తీసుకురావాలని నిర్మాతలు లక్ష్యంగా పెట్టుకున్నారు.