ఒకే రీల్‌తో 30 కోట్ల వ్యూస్.. ఆందోళనల మధ్య ప్రధాని మోదీ సరికొత్త ప్రపంచ రికార్డు

ప్రధానమంత్రి నరేంద్ర మోదీ సోషల్ మీడియాలో మునుపెన్నడూ లేని విధంగా సరికొత్త ప్రపంచ రికార్డు సృష్టించారు. ఆయన పోస్ట్ చేసిన ఒకే ఒక్క ఇన్‌స్టాగ్రామ్ రీల్ కేవలం 24 గంటల్లోనే 303 మిలియన్లకు పైగా వ్యూస్ సాధించి, ప్రపంచవ్యాప్తంగా సంచలనం సృష్టించింది. ఇంతకుముందు 300 మిలియన్ల వ్యూస్‌తో ఉన్న గ్లోబల్ రికార్డును ఈ రీల్ అధిగమించింది. దేశ రాజధాని ఢిల్లీలోని జంతర్ మంతర్ వద్ద పోటీ పరీక్షల పత్రాల లీకేజీలపై వేలాది మంది విద్యార్థులు తీవ్రస్థాయిలో ఆందోళనలు చేస్తున్న తరుణంలోనే, ప్రధాని ఈ డిజిటల్ మైలురాయిని అందుకోవడం రాజకీయ వర్గాల్లో చర్చనీయాంశంగా మారింది.

దేశవ్యాప్తంగా పరీక్షల్లో అవకతవకలు జరిగాయని ఆరోపిస్తూ, పూర్తిస్థాయి జవాబుదారీతనం, వ్యవస్థాగత సంస్కరణలు చేపట్టాలని డిమాండ్ చేస్తూ వేలాది మంది విద్యార్థులు, యువకులు జంతర్ మంతర్ వద్ద తమ నిరసనలను కొనసాగిస్తున్నారు. ఈ నేపథ్యంలో, ప్రధాని మోదీ నేరుగా యువతతో, ముఖ్యంగా 'జెన్ Z' తరంతో కనెక్ట్ అయ్యేందుకు డిజిటల్ మాధ్యమాన్ని ఎంచుకున్నారు. అర్ధరాత్రి సమయంలో ఆయన పోస్ట్ చేసిన ఒక సెల్ఫీ వీడియో, యువతలో నెలకొన్న ఆందోళనలను పరిష్కరించే ప్రయత్నం చేసింది. పరీక్ష పేప‌ర్ల లీకేజీలను ప్రభుత్వం తేలికైన విషయంగా కాకుండా అత్యంత తీవ్రమైన అంశంగా పరిగణిస్తోందని, బాధ్యులపై కఠిన చర్యలు తప్పవని ఆయన ఆ వీడియోలో భరోసా ఇచ్చారు.

ఈ వీడియోకు అనూహ్యమైన స్పందన రావడమే కాకుండా, ప్రధాని మోదీ సోషల్ మీడియా ఖాతాకు రాత్రికి రాత్రే 10 లక్షల మంది కొత్త ఫాలోవర్లు పెరిగారు. ఈ చారిత్రాత్మక స్పందన నేపథ్యంలో ప్రధాని మరో వీడియో సందేశాన్ని విడుదల చేశారు. "మిత్రులారా, ధన్యవాదాలు" అంటూ ప్రారంభించిన ఆ వీడియోలో, యువత నుంచి వచ్చిన సానుకూల సూచనలకు, వారి మద్దతుకు కృతజ్ఞతలు తెలిపారు. గత రెండున్నర నెలలుగా విద్యార్థుల విలువైన విద్యా సంవత్సరం నష్టపోకుండా కాపాడటమే తమ ప్రభుత్వ ప్రథమ కర్తవ్యమని, అందుకోసమే త్వరితగతిన పునఃపరీక్షలు నిర్వహించామని మోదీ తన తొలి వీడియోలో వివరించారు.

అంతేకాకుండా పేపర్ లీకేజీలకు పాల్పడే వ్యక్తులు, సిండికేట్లపై కఠిన చర్యలు తీసుకునేందుకు వీలుగా ఫాస్ట్-ట్రాక్ కోర్టులు, కఠిన శిక్షలతో కూడిన పటిష్ఠ‌మైన చట్టాన్ని కేంద్ర కేబినెట్ ముందుకు తీసుకెళ్తుందని కూడా ఆయన ప్రకటించారు. ప్రజల నుంచి, ముఖ్యంగా యువత నుంచి వచ్చే అభిప్రాయాలు, సూచనలు నాయకత్వానికి, పౌరులకు మధ్య బంధాన్ని మరింత బలోపేతం చేస్తాయని మోదీ తన తాజా వీడియోలో వ్యాఖ్యానించారు. "మీ ఈ ప్రేమ ఇలాగే ఉంటుంది. మన బంధం మరింత శక్తివంతంగా కొనసాగుతుంది" అని పేర్కొంటూ, నిర్మాణాత్మక భాగస్వామ్యం అందించినందుకు మద్దతుదారులకు ఆయన ధన్యవాదాలు తెలిపారు.