ఫ్లిప్‌కార్ట్‌కు భారీ షాక్.. ఐఫోన్‌కు బదులు ఆయిల్ పంపినందుకు రూ.1.81 లక్షల జరిమానా

ఆన్‌లైన్ షాపింగ్ దిగ్గజం ఫ్లిప్‌కార్ట్‌కు, దాని ప్లాట్‌ఫామ్‌లోని ఓ విక్రేతకు ముంబై వినియోగదారుల ఫోరం గట్టి షాకిచ్చింది. ఖరీదైన యాపిల్ ఐఫోన్ ఆర్డర్ చేసిన వినియోగదారుడికి 'బియర్డ్ గ్రోత్ ఆయిల్' (గడ్డం పెరిగే నూనె) పంపిన కేసులో బాధితుడికి రూ.1.11 లక్షల అసలు మొత్తంతో పాటు రూ.70,000 నష్టపరిహారం చెల్లించాలని ఆదేశించింది. ఫిర్యాదులను సరైన పరిష్కారం చూపకుండా పదేపదే మూసివేయడం 'అనుచిత వాణిజ్య విధానం' కిందకే వస్తుందని కమిషన్ తన తీర్పులో పేర్కొంది.

అస‌లేం జ‌రిగిందంటే..!
ముంబైలోని పోవాయ్ ప్రాంతానికి చెందిన ఓ వ్యక్తి 2023 ఏప్రిల్ 22న ఫ్లిప్‌కార్ట్ ద్వారా రూ.1,11,793 వెచ్చించి యాపిల్ ఐఫోన్ 14 ప్రో (128 GB)ను నో-కాస్ట్ ఈఎంఐ స్కీమ్‌లో ఆర్డర్ చేశారు. మరుసటి రోజు డెలివరీ అయిన ప్యాకేజీని తెరిచి చూడగా, అందులో స్మార్ట్‌ఫోన్‌కు బదులుగా బియర్డ్ గ్రోత్ ఆయిల్ బాటిల్, ప్యాకింగ్ సామగ్రి ఉండటంతో ఆయన షాక్ అయ్యారు. వెంటనే ఫ్లిప్‌కార్ట్ కస్టమర్ సపోర్ట్‌ను సంప్రదించి, అవసరమైన అన్ని ఆధారాలు సమర్పించారు.

అయితే, 2023 ఏప్రిల్ నుంచి మే మధ్య పలుమార్లు ఫిర్యాదు చేసినా ఫ్లిప్‌కార్ట్ నుంచి ఎలాంటి సరైన స్పందన రాలేదు. సమస్యను పరిష్కరించకుండానే, ఆయన ఫిర్యాదును 'పరిష్కరించబడింది' అని పదేపదే మూసివేశారు. దీంతో విసిగిపోయిన బాధితుడు ముంబై సబర్బన్ జిల్లా వినియోగదారుల వివాదాల పరిష్కార కమిషన్‌ను ఆశ్రయించారు.

ఈ కేసును విచారించిన ఫోరం, ఫ్లిప్‌కార్ట్, విక్రేత ఇంటర్నేషనల్ వ్యాల్యూ రిటైల్ ప్రైవేట్ లిమిటెడ్ తీరును తప్పుబట్టింది. ఆన్‌లైన్ ప్లాట్‌ఫామ్‌లో వినియోగదారుడు డబ్బు చెల్లించినప్పుడు, ఆర్డర్ చేసిన వస్తువును సరిగ్గా అందించాల్సిన బాధ్యత ఈ-కామర్స్ సంస్థపై ఉంటుందని స్పష్టం చేసింది. తప్పు జరిగాక కేవలం అమ్మకానికి మధ్యవర్తిత్వం వహించామని చెప్పి చేతులు దులుపుకోలేదని, ఫిర్యాదును విచారించడంలో, తప్పుగా పంపిన వస్తువును వెనక్కి తీసుకోవడంలో, రీఫండ్ లేదా రీప్లేస్‌మెంట్ ఇవ్వడంలో విఫలమవడం స్పష్టమైన సేవా లోపమని పేర్కొంది.

ఈ నేపథ్యంలో ఫ్లిప్‌కార్ట్, సెల్లర్ ఇద్దరూ కలిసి బాధితుడికి అసలు మొత్తం రూ.1,11,793ను, ఆర్డర్ చేసిన తేదీ (ఏప్రిల్ 22, 2023) నుంచి 9 శాతం వార్షిక వడ్డీతో కలిపి చెల్లించాలని ఆదేశించింది. దీంతో పాటు బాధితుడు ఎదుర్కొన్న మానసిక వేదనకు నష్టపరిహారంగా రూ.50,000, కేసు ఖర్చుల కింద మరో రూ.20,000 కలిపి మొత్తం 45 రోజుల్లోగా చెల్లించాలని తీర్పు ఇచ్చింది.

ఇదే కేసులో ప్రతివాదిగా ఉన్న యాపిల్ ఇండియా, తాము కేవలం ఉత్పత్తులను డీలర్లకు విక్రయిస్తామని, డెలివరీ ప్రక్రియతో తమకు సంబంధం లేదని వాదించింది. ఈ వాదనను అంగీకరించిన ఫోరం, యాపిల్ ఇండియాపై కేసును కొట్టివేసింది.