పార్లమెంట్‌కు నల్ల దుస్తుల్లో విపక్షాలు.. పోలీసుల దౌర్జన్యంపై ఆగ్రహం

ప్రధాని అధికారిక నివాసం వద్ద మంగళవారం జరిగిన హైడ్రామా అనంతరం, బుధవారం ఇండియా కూటమి ఎంపీలు తమ నిరసనను తీవ్రతరం చేశారు. పోలీసుల దౌర్జన్యానికి వ్యతిరేకంగా నిరసన తెలుపుతూ ఎంపీలందరూ నల్ల దుస్తులు ధరించి పార్లమెంట్‌కు చేరుకున్నారు. పార్లమెంట్ వెలుపల గుమిగూడిన విపక్ష నేతలు, ప్రభుత్వానికి వ్యతిరేకంగా నినాదాలు చేస్తూ తమ ఆగ్రహాన్ని వ్యక్తం చేశారు.

నీట్ పేపర్ లీక్ వ్యవహారంలో విద్యార్థులకు న్యాయం చేయాలని డిమాండ్ చేస్తూ విద్యార్థి సంఘాలు పిలుపునిచ్చిన 'చలో సంసద్' మార్చ్‌కు మద్దతుగా నిన్న‌ విపక్షాలు ఆందోళన చేపట్టాయి. ఈ క్రమంలో లోక్‌సభ ప్రతిపక్ష నేత రాహుల్ గాంధీ, ప్రియాంక గాంధీ వాద్రా, సమాజ్‌వాదీ పార్టీ అధినేత అఖిలేశ్‌ యాదవ్ సహా పలువురు ఇండియా కూటమి నేతలు ప్రధాని నివాసం వద్ద నిరసనకు యత్నించారు. అయితే, పోలీసులు వారిని బలవంతంగా అదుపులోకి తీసుకుని వ్యాన్లు, బస్సుల్లో తరలించారు. ఈ ఘటన రాజకీయంగా తీవ్ర దుమారం రేపింది.

ఈ అరెస్టులు, పోలీసుల తీరును తీవ్రంగా ఖండిస్తూ విపక్ష ఎంపీలు నేడు నల్ల దుస్తుల్లో పార్లమెంట్‌కు వచ్చారు. కాంగ్రెస్, సమాజ్‌వాదీ పార్టీ, తృణమూల్ కాంగ్రెస్ సహా పలు పార్టీల ఎంపీలు మకర ద్వార్ వద్ద నిలబడి ప్రభుత్వ వైఖరిపై నిరసన తెలిపారు.

ఈ సందర్భంగా కాంగ్రెస్ ఎంపీ ప్రమోద్ తివారీ మాట్లాడుతూ.. "నిన్న ప్రతిపక్ష నేతను సిగ్గులేకుండా అరెస్ట్ చేసి, గాయపరిచిన తీరు దారుణం. దేశంలో అప్రకటిత ఎమర్జెన్సీ అమలవుతోందని చెప్పడానికి ఇదే నిదర్శనం. రాజ్యాంగం ఉనికిలో లేదు. ఈ ప్రభుత్వంతో శాంతియుతంగా పోరాడటమే మా ముందున్న ఏకైక మార్గం" అని తీవ్రంగా విమర్శించారు. 

మరో కాంగ్రెస్ ఎంపీ కె. సురేశ్‌ మాట్లాడుతూ.. "ప్రతిపక్ష నేత, ఇతర ఎంపీలపై పోలీసులు జరిపిన దౌర్జన్యానికి నిరసనగానే మేమంతా నల్ల దుస్తులు ధరించి నిరసన తెలుపుతున్నాం" అని అన్నారు.

లక్షలాది మంది విద్యార్థుల భవిష్యత్తుకు సంబంధించిన నీట్ పేపర్ లీక్ వ్యవహారంపై ప్రభుత్వం, విపక్షాల మధ్య విభేదాలు తారాస్థాయికి చేరడంతో పార్లమెంట్ కార్యకలాపాలు పూర్తిగా స్తంభించిపోయాయి. ఈ వివాదం కారణంగా ఉభయ సభల్లోనూ ప్రతిష్టంభన కొనసాగుతోంది.