ప్రియాంక గాంధీ పేరుతో మోసం.. కేరళలో మంత్రి పదవులకు బేరం!

కాంగ్రెస్ ఎంపీ ప్రియాంక గాంధీ వాద్రా కార్యాలయం నుంచి మాట్లాడుతున్నామంటూ సైబర్ నేరగాళ్లు కేరళ కాంగ్రెస్ నాయకులను మోసం చేసేందుకు యత్నించారు. రాష్ట్రంలో మంత్రి పదవులు ఇప్పిస్తామని నమ్మబలికి, వారి నుంచి కోట్ల రూపాయలు డిమాండ్ చేశారు. ఈ ఘటనపై ఫిర్యాదులు అందడంతో పోలీసులు సైబర్ మోసం కింద కేసు నమోదు చేసి దర్యాప్తు చేపట్టారు.

ఈ మోసం ఎలత్తూర్ ఎమ్మెల్యే విద్యా బాలకృష్ణన్‌కు జులై 6న వచ్చిన ఒక వాట్సాప్ కాల్‌తో వెలుగులోకి వచ్చింది. ప్రియాంక గాంధీ ఢిల్లీ కార్యాలయం నుంచి 'రాజ్‌కుమార్' అనే వ్యక్తిని మాట్లాడుతున్నానని పరిచయం చేసుకున్న కాలర్, కేరళలో త్వరలో మంత్రివర్గ పునర్వ్యవస్థీకరణ జరగనుందని నమ్మబలికాడు. మంత్రి పదవి కావాలంటే రూ.3 కోట్లు చెల్లించాలని డిమాండ్ చేశాడు. ఇదే నంబర్ నుంచి వడకర ఎంపీ షఫీ పరంబిల్‌, ఇడుక్కి ఎంపీ డీన్ కురియాకోస్‌లకు కూడా ఇటువంటి కాల్స్ వచ్చినట్లు ప్రాథమిక విచారణలో తేలింది.

ఈ వ్యవహారంపై ప్రియాంక గాంధీ వ్యక్తిగత కార్యదర్శి డి.ఎస్. రాజ్‌కుమార్ కేరళ డీజీపీకి, వయనాడ్ ఎస్పీకి అధికారికంగా ఫిర్యాదు చేశారు. దీంతో కల్పేట సైబర్ పోలీసులు, కోజికోడ్ సైబర్ సెల్ వేర్వేరుగా కేసులు నమోదు చేసి దర్యాప్తు ప్రారంభించారు. ఈ కాల్స్ ఢిల్లీ నుంచి వచ్చినట్లు గుర్తించిన పోలీసులు, నిందితులు అత్యాధునిక 'కాలర్ స్పూఫింగ్' టెక్నాలజీని ఉపయోగించి ఉండవచ్చని అనుమానిస్తున్నారు.

కాంగ్రెస్ అధిష్ఠానం సూచనల మేరకే తాను పోలీసులను ఆశ్రయించినట్లు ఎమ్మెల్యే విద్యా బాలకృష్ణన్ తెలిపారు. ఈ విషయాన్ని ఏమాత్రం తేలిగ్గా తీసుకోబోమని వ్యవసాయ మంత్రి టి. సిద్ధిఖీ స్పష్టం చేశారు. మరోవైపు, మంత్రివర్గ విస్తరణ వార్తలను కేరళ ముఖ్యమంత్రి వీడీ సతీశన్ తోసిపుచ్చారు.