హైదరాబాద్‌లోని బోడుప్పల్, రాయదుర్గం పరిసర ప్రాంతాల్లో ఈరోజు (గురువారం) విద్యుత్ సరఫరాకు అంతరాయం కలగనుంది. లైన్ల నిర్వహణ పనులు, చెట్ల కొమ్మల తొలగింపు నేపథ్యంలో ఈ కోతలు విధిస్తున్నట్లు విద్యుత్ శాఖ అధికారులు వెల్లడించారు. వినియోగదారులు ఈ మార్పును గమనించి సహకరించాలని వారు కోరారు.

ఇందిరా నగర్ 33/11 కేవీ సబ్‌స్టేషన్ పరిధిలోని రెండు ఫీడర్లలో విద్యుత్ సరఫరా నిలిపివేస్తున్నట్లు అసిస్టెంట్ ఇంజనీర్ ఎన్. వేణుగోపాల్ తెలిపారు. ఉదయం 10 గంటల నుంచి మధ్యాహ్నం 12 గంటల వరకు 11 కేవీ ఎస్‌బీఆర్ కాలనీ ఫీడర్ పరిధిలోని పద్మావతి కాలనీ, అమ్మాసాని వెంకట రెడ్డి కాలనీ, ఆర్‌ఎన్‌జీఎస్ కాలనీ, బీఎల్ నగర్, అంజయ్య ఎన్‌క్లేవ్, టెలిఫోన్ కాలనీ ఫేజ్-2, పీఎన్ఆర్ కాలనీ, రెడ్డిస్ కాలనీ, భవానీ కాలనీ, శుభోదయ కాలనీ, లెక్చరర్స్ కాలనీ, గ్రీన్ సిటీ కాలనీ, అనగపురి కాలనీ, భీంరెడ్డి కాలనీ, ఎన్ఐఎన్ కాలనీలలో విద్యుత్ సరఫరా ఉండదు.

అదేవిధంగా, మధ్యాహ్నం 3 గంటల నుంచి సాయంత్రం 5 గంటల వరకు 11 కేవీ బొల్లిగూడెం ఫీడర్ పరిధిలోని బొల్లిగూడెం, అంజయ్య ఎన్‌క్లేవ్, ఎస్‌బీఆర్ కాలనీ, టెలిఫోన్ కాలనీ, రాజలింగం కాలనీ ఫేజ్-1 & 2, సూరజ్ నగర్, మహాలక్ష్మి నగర్, బాలాజీ నగర్, లక్ష్మారెడ్డి నగర్ ప్రాంతాల్లో విద్యుత్ సరఫరా నిలిచిపోనుంది.

ఇదిలా ఉండగా, రాయదుర్గం సెక్షన్ పరిధిలోనూ మరమ్మతుల కారణంగా ఉదయం 9 గంటల నుంచి మధ్యాహ్నం 3 గంటల వరకు విద్యుత్ కోతలు అమల్లో ఉంటాయి. ఓక్ రిడ్జ్, జైన్ హోమ్స్ 11 కేవీ ఫీడర్ల పరిధిలోని ఖాజాగూడ గ్రామం, జైన్ హోమ్స్ ప్రాంతాల్లో సరఫరా నిలిపివేయనున్నారు. పనులు పూర్తయిన వెంటనే విద్యుత్ సరఫరాను పునరుద్ధరిస్తామని అధికారులు స్పష్టం చేశారు.