యుద్ధాల వెనుక వ్యాపారమే: దర్శకుడు త్రివిక్రమ్ శ్రీనివాస్

ప్రముఖ సినీ దర్శకుడు, మాటల మాంత్రికుడు త్రివిక్రమ్ శ్రీనివాస్ జీవితం, సమాజంపై కీలక వ్యాఖ్యలు చేశారు. ఒంగోలులో శనివారం నిర్వహించిన రాష్ట్ర ప్రసూతి, గైనకాలజిస్టుల 11వ వార్షిక మహాసభకు ఆయన ముఖ్య అతిథిగా హాజరై ప్రసంగించారు. ఈ సందర్భంగా నిర్వాహక కమిటీ అడిగిన పలు ప్రశ్నలకు ఆయన తనదైన శైలిలో ఆలోచనాత్మకమైన సమాధానాలిచ్చారు.

"ప్రపంచంలో యుద్ధాల వెనుక కులం, మతం, ప్రాంతం వంటి కారణాలు ఉండవని, కేవలం వ్యాపార ప్రయోజనాలే పరమావధిగా ఉంటాయని" త్రివిక్రమ్ విశ్లేషించారు. సహజ వనరులు, ఖనిజాల కోసమే ప్రధానంగా యుద్ధాలు జరుగుతాయని, ప్రేమ వంటి భావోద్వేగాల వల్ల ఘర్షణలు తలెత్తుతాయనడం కేవలం భ్రమ అని ఆయన స్పష్టం చేశారు.

ప్రస్తుత కాలంలో ప్రతి అంశం ద్రవ్యంతో ముడిపడి ఉందని, ఆర్థిక ప్రాధాన్యతను గుర్తించక తప్పదని త్రివిక్రమ్ పేర్కొన్నారు. జీవితంలో తప్పులు, అప్పులు లేని వారు ఎవరూ ఉండరని చెబుతూ, "చిన్న చిన్న తప్పిదాలే జీవితానికి పరిపూర్ణతను, అందాన్ని ఇస్తాయి" అని వ్యాఖ్యానించారు. తాము పరిపూర్ణులమనే అహంభావం ఎవరికీ తగదని ఆయన హితవు పలికారు.

వైద్య వృత్తిలోని సవాళ్లను, ముఖ్యంగా లేబర్ రూమ్‌లలో గైనకాలజిస్టులు ఎదుర్కొనే క్లిష్ట పరిస్థితులను ఆయన ప్రత్యేకంగా ప్రశంసించారు. సినిమాల్లో వైద్యులను ప్రతికూల కోణంలో చూపిస్తున్నారనే ప్రశ్నకు స్పందిస్తూ.. వారికి గట్టి సంఘాలు లేకపోవడమే అందుకు కారణమని సరదాగా వ్యాఖ్యానించారు. ఈ మహాసభకు ఆంధ్రప్రదేశ్, కర్ణాటక, కేరళ, తమిళనాడు రాష్ట్రాల నుంచి సుమారు 2,000 మంది వైద్యులు హాజరయ్యారు.