రైలులో ఫస్ట్ ఏసీ కోచ్... హనీమూన్ సూట్‌గా మార్పు! వీడియో వైరల్

భారతీయ రైల్వేకు చెందిన ఒక ఫస్ట్ ఏసీ కోచ్‌ను నూతన దంపతుల కోసం హనీమూన్ సూట్‌గా తీర్చిదిద్దిన వీడియో ప్రస్తుతం సోషల్ మీడియాలో వైరల్‌గా మారింది. ఈ వినూత్న ఆలోచనను కొందరు అభినందిస్తుండగా, ప్రజా రవాణా వ్యవస్థలో ఇటువంటివి ఎంతవరకు సబబని మరికొందరు సందేహాలు వ్యక్తం చేస్తున్నారు.

మహారాష్ట్రలో ప్రయాణిస్తున్న ఒక రైలులో ఈ దృశ్యం కనిపించింది. సదరు ఫస్ట్ ఏసీ కంపార్ట్‌మెంట్‌ను బెలూన్లు, పూలదండలు, గులాబీ రేకులతో రమణీయంగా అలంకరించారు. గోడపై "ఐ లవ్ యూ" అని రాసి ఉన్న పోస్టర్లను కూడా ఏర్పాటు చేశారు. ఈ అలంకరణతో ఆ సాధారణ రైలు బోగీ కాస్తా ఒక విలాసవంతమైన ప్రైవేట్ వేడుక వేదికగా మారిపోయింది.

జాల్నాకు చెందిన ఒక జంట కోసం ఔరంగాబాద్‌కు చెందిన 'రాహత్ రూమ్ డెకరేషన్' బృందం ఈ ఏర్పాట్లు చేసింది. రైలు జాల్నా స్టేషన్‌కు చేరుకోవడానికి ముందే ఈ బృందం కోచ్‌ను సిద్ధం చేసింది. ఫస్ట్ ఏసీ క్యాబిన్‌లోని రెండు బెర్తులను సదరు జంట ముందుగానే బుక్ చేసుకోవడంతో, దీని కోసం రైల్వే నుంచి ఎటువంటి ప్రత్యేక అనుమతులు అవసరం కాలేదని నిర్వాహకులు వివరించారు.

ఈ ఉదంతంపై రైల్వే అధికారులు స్పందిస్తూ, ప్రయాణికులు మొత్తం క్యాబిన్‌ను రిజర్వ్ చేసుకున్నందున ఇందులో నిబంధనల ఉల్లంఘన ఏదీ లేదని స్పష్టం చేశారు. రైల్వే ఆస్తులకు నష్టం వాటిల్లనంత వరకు, తోటి ప్రయాణికులకు అసౌకర్యం కలగనంత వరకు తాము బుక్ చేసుకున్న ప్రైవేట్ క్యాబిన్‌లో ఇటువంటి అలంకరణలు చేసుకోవచ్చని వారు పేర్కొన్నారు.

జూలై 7న వెలుగులోకి వచ్చిన ఈ వీడియోపై నెటిజన్లు భిన్నంగా స్పందిస్తున్నారు. కొందరు దీనిని 'సుహాగ్‍రాత్ ఎక్స్‌ప్రెస్", "హనీమూన్ ఆన్ వీల్స్" అంటూ సరదాగా వ్యాఖ్యానించగా, మరికొందరు మాత్రం బెలూన్లు వంటి వస్తువుల వల్ల అగ్ని ప్రమాదాలు సంభవించే అవకాశం ఉందని, అలాగే పరిశుభ్రత దెబ్బతింటుందని ఆందోళన వ్యక్తం చేస్తున్నారు. ఈ అంశంపై స్పష్టత ఇవ్వాల్సిందిగా కోరుతూ రైల్వే మంత్రి అశ్విని వైష్ణవ్‌ను నెటిజన్లు ట్యాగ్ చేస్తున్నారు.