భక్తి పారవశ్యంలో రవితేజ.. ఆకట్టుకుంటున్న 'ఇరుముడి' ఫస్ట్ సింగిల్

మాస్ మహారాజా రవితేజ హీరోగా, టాలెంటెడ్ డైరెక్టర్ శివ నిర్వాణ దర్శకత్వంలో తెరకెక్కుతున్న చిత్రం ‘ఇరుముడి’. డివోషనల్ థ్రిల్లర్‌గా రూపొందుతున్న ఈ సినిమాపై మొదటి నుంచి ప్రేక్షకుల్లో ప్రత్యేక ఆసక్తి నెలకొంది. తాజాగా ఈ సినిమా నుంచి మొదటి పాట 'ఇరుముడి కట్టు'ను చిత్ర బృందం విడుదల చేసింది. అయ్యప్ప స్వామి భక్తి నేపథ్యంలో సాగే ఈ గీతం, విడుదలైన వెంటనే సోషల్ మీడియాలో విశేషమైన స్పందనను రాబట్టుకుంటూ సినిమాపై అంచనాలను మరింత పెంచుతోంది.

ఈ లిరికల్ వీడియోలో రవితేజ అయ్యప్ప మాలధారణలో కనిపించి అభిమానులను ఆశ్చర్యపరిచారు. పూర్తి భక్తి పారవశ్యంలో ఆయన వేసిన స్టెప్పులు, హావభావాలు పాటకు ప్రధాన ఆకర్షణగా నిలిచాయి. 'స్వామియే శరణం అయ్యప్ప' అంటూ మొదలయ్యే ఈ గీతం, ఆద్యంతం భక్తి రసాన్ని పండిస్తూ శ్రోతలను కట్టిపడేస్తోంది. పాటలోని విజువల్స్, రవితేజ కొత్త లుక్ చూస్తుంటే సినిమా ఏ స్థాయిలో ఉండబోతోందనే ఆసక్తి రేకెత్తుతోంది. విడుదలైన కొద్ది గంటల్లోనే ఈ పాట సోషల్ మీడియాలో ట్రెండింగ్‌గా మారింది.

ఈ పాటకు ప్రముఖ సంగీత దర్శకుడు జీవీ ప్రకాశ్‌ కుమార్ అందించిన సంగీతం అద్భుతంగా ఉంది. భక్తి గీతానికి అవసరమైన ఆర్కెస్ట్రేషన్‌తో ఆయన తన మార్క్ చూపించారు. గాయకుడు అనంతు తన గాత్రంతో పాటకు ప్రాణం పోశారు. ఇక, ఈ పాటకు సాహిత్యం అందించడంలో దర్శకుడు శివ నిర్వాణ కూడా భాగం కావడం విశేషం. రచయిత కల్యాణ్ చక్రవర్తితో కలిసి ఆయన ఈ గీతాన్ని రచించారు. దర్శకుడిగానే కాకుండా మంచి సాహిత్యకారుడిగా కూడా శివ నిర్వాణ తన ప్రతిభను మరోసారి నిరూపించుకున్నారు. గతంలోనే ఈ సినిమాలో రెండు అయ్యప్ప భక్తి గీతాలు ఉంటాయని జీవీ ప్రకాశ్‌ వెల్లడించిన సంగతి తెలిసిందే.

డివోషనల్ థ్రిల్లర్ అనే విభిన్నమైన జానర్‌లో వస్తున్న 'ఇరుముడి'లో భక్తి, భావోద్వేగాలు, థ్రిల్ అంశాలు కలగలిసి ఉంటాయని సమాచారం. తొలి పాటకు వస్తున్న అనూహ్య స్పందన చూస్తుంటే, సినిమా ఆడియో కూడా పెద్ద హిట్ అవుతుందని స్పష్టమవుతోంది. ముఖ్యంగా అయ్యప్ప భక్తుల నుంచి ఈ పాటకు ప్రత్యేక ఆదరణ లభిస్తోంది. ప్రస్తుతం ట్రెండింగ్‌లో ఉన్న ఈ పాట, సినిమాపై ఉన్న అంచనాలను మరింతగా పెంచడం ఖాయం. తదుపరి అప్‌డేట్స్ కోసం అభిమానులు ఆసక్తిగా ఎదురుచూస్తున్నారు.