రెండో టీ20లోనూ అదే ఫలితం... టీమిండియాపై క్లీన్ స్వీప్ చేసిన ఐర్లాండ్
- రెండో టీ20లో భారత్పై ఒక్క పరుగు తేడాతో ఐర్లాండ్ గెలుపు
- రెండు మ్యాచ్ల సిరీస్ను 2-0తో క్లీన్స్వీప్ చేసిన ఐరిష్ జట్టు
- భారత్ 16 సిరీస్ల విజయాల జైత్రయాత్రకు అడ్డుకట్ట
- కీలక ఆటగాళ్లు లేకుండానే అద్భుతం చేసిన ఐర్లాండ్
- తిలక్ వర్మ హాఫ్ సెంచరీ చేసినా తప్పని ఓటమి
ఈ మ్యాచ్లో టాస్ గెలిచిన భారత్ బౌలింగ్ ఎంచుకోగా, తొలుత బ్యాటింగ్ చేసిన ఐర్లాండ్ నిర్ణీత 20 ఓవర్లలో 8 వికెట్ల నష్టానికి 154 పరుగులు చేసింది. ఆ జట్టులో హ్యారీ టెక్టర్ (47 బంతుల్లో 53) హాఫ్ సెంచరీతో రాణించగా, బెంజమిన్ కాలిట్జ్ (23 బంతుల్లో 37) కీలక పరుగులు జోడించాడు. భారత బౌలర్లలో ప్రిన్స్ యాదవ్ 3 వికెట్లు పడగొట్టగా, అర్ష్దీప్ సింగ్, శివమ్ దూబే చెరో రెండు వికెట్లు తీశారు.
అనంతరం 155 పరుగుల లక్ష్యంతో బరిలోకి దిగిన భారత్, ఆదిలోనే వికెట్లు కోల్పోయి కష్టాల్లో పడింది. తిలక్ వర్మ (46 బంతుల్లో 55) ఒంటరి పోరాటం చేసినప్పటికీ, ఇతర బ్యాటర్లు విఫలమయ్యారు. చివరి ఓవర్లలో హర్షిత్ రాణా (10 బంతుల్లో 21) మెరుపులు మెరిపించినా, భారత్ 20 ఓవర్లలో 9 వికెట్లకు 153 పరుగులు మాత్రమే చేసి ఓటమిపాలైంది. ఐర్లాండ్ బౌలర్లలో జై మూంద్రా, మాథ్యూ హొల్లార్డ్ చెరో 3 వికెట్లు తీసి తమ జట్టు విజయంలో కీలకపాత్ర పోషించారు. మార్క్ అడైర్, పాల్ స్టిర్లింగ్ వంటి కీలక ఆటగాళ్లు లేకుండానే ఐర్లాండ్ ఈ అద్భుత విజయం సాధించడం విశేషం. టీమిండియా టీ20 కెప్టెన్ గా శ్రేయస్ అయ్యర్ తొలి సిరీస్ లోనే ప్రతికూల ఫలితాన్ని ఎదుర్కొన్నాడు.
