పారిస్‌లో రాజమౌళికి అరుదైన గౌరవం

తెలుగు సినిమా ఖ్యాతిని ప్రపంచానికి చాటిచెప్పిన దర్శకధీరుడు ఎస్ఎస్ రాజమౌళి తన ఖాతాలో మరో ప్రతిష్టాత్మక గౌరవాన్ని వేశారు. ఫ్రాన్స్ రాజధాని పారిస్‌లోని ప్రఖ్యాత 'సినెమాథెక్ ఫ్రాన్సైస్‌'లో ఆయనకు అరుదైన గౌరవం దక్కింది. ఈ సంస్థలో ఆయనకు ప్రత్యేక స్థానం కల్పిస్తూ సత్కరించారు. ఈ చారిత్రక ఫిల్మ్ ఇన్‌స్టిట్యూషన్‌లో రాజమౌళి చిత్రాలను కూడా ప్రదర్శించారు.

ఈ సందర్భంగా రాజమౌళి తన ఆనందాన్ని పంచుకుంటూ ఉద్వేగానికి లోనయ్యారు. "పారిస్‌లో నా చిత్రాలను ప్రదర్శించడం, నన్ను ఇక్కడికి ఆహ్వానించడం గొప్ప గౌరవంగా భావిస్తున్నాను. కానీ, ఇది నేను అస్సలు ఊహించని ఒక మధురమైన ఆశ్చర్యం. ఈ అనుభూతిని మాటల్లో పూర్తిగా వర్ణించలేను" అని అన్నారు.

"ప్రపంచంలోని అత్యంత ప్రతిష్ఠాత్మకమైన ఫిల్మ్ ఇన్‌స్టిట్యూషన్లలో ఒకటైన, లెజెండరీ హెన్రీ లాంగ్లోయిస్ పేరుతో ఉన్న ఈ సంస్థలో శాశ్వత స్థానం లభించడం జీవితాంతం గుర్తుండిపోతుంది. భారతీయ సినిమాను ఇంత ఆప్యాయంగా ఆదరించిన లెజెండరీ దర్శకుడు కోస్టా గావ్రాస్‌కు, సినెమాథెక్ ఫ్రాన్సైస్ కుటుంబ సభ్యులందరికీ నా హృదయపూర్వక కృతజ్ఞతలు" అని రాజమౌళి తెలిపారు. రాజమౌళికి దక్కిన ఈ అరుదైన గౌరవం పట్ల భారతీయ సినీ ప్రియులు, ప్రముఖులు హర్షం వ్యక్తం చేస్తున్నారు.