99 శాతం గుండెపోట్లకు ఈ నాలుగే కారణాలు... తాజా అధ్యయనంలో కీలక అంశాలు!

ప్రపంచవ్యాప్తంగా లక్షలాది మంది ప్రాణాలు తీస్తున్న గుండెపోటు, స్ట్రోక్, గుండె వైఫల్యం వంటి తీవ్రమైన ఆరోగ్య సమస్యలు ఎలాంటి హెచ్చరిక లేకుండా అకస్మాత్తుగా రావని, వాటి వెనుక స్పష్టమైన కారణాలుంటాయని ఒక భారీ అంతర్జాతీయ అధ్యయనం తేల్చింది. మొదటిసారి ఇలాంటి సమస్యల బారిన పడిన వారిలో 99 శాతం మందికి, ఆ జబ్బులు రావడానికి కొన్నేళ్ల ముందే నాలుగు ప్రధాన ప్రమాద కారకాల్లో కనీసం ఒకటి ఉన్నట్లు ఈ పరిశోధనలో వెల్లడైంది. అధిక రక్తపోటు (హై బీపీ), అధిక కొలెస్ట్రాల్, రక్తంలో అధిక చక్కెర స్థాయిలు (డయాబెటిస్), పొగాకు వాడకం అనేవి ఆ నాలుగు ప్రమాద కారకాలని పరిశోధకులు గుర్తించారు.

సౌత్ కొరియాలోని యోన్సీ యూనివర్సిటీ, అమెరికాకు చెందిన నార్త్‌వెస్టర్న్ మెడిసిన్ పరిశోధకులు సంయుక్తంగా ఈ అధ్యయనం నిర్వహించారు. దీని కోసం సౌత్ కొరియాలో 93 లక్షల మంది, అమెరికాలో దాదాపు 7,000 మంది వయోజనుల ఆరోగ్య డేటాను సుమారు రెండు దశాబ్దాల పాటు విశ్లేషించారు. గుండె సంబంధిత సమస్యలు వచ్చిన వారిలో 93 శాతం కంటే ఎక్కువ మందికి, ఈ నాలుగింటిలో రెండు లేదా అంతకంటే ఎక్కువ ప్రమాద కారకాలు ముందుగానే ఉన్నట్లు కనుగొన్నారు. ఈ అధ్యయన ఫలితాలు ప్రముఖ 'జర్నల్ ఆఫ్ ది అమెరికన్ కాలేజ్ ఆఫ్ కార్డియాలజీ'లో ప్రచురితమయ్యాయి.

ఈ పరిశోధన ప్రకారం, అన్ని ప్రమాద కారకాల్లోకెల్లా అధిక రక్తపోటు అత్యంత సాధారణంగా కనిపించింది. సౌత్ కొరియాలో 95 శాతం, అమెరికాలో 93 శాతం కేసుల్లో బాధితులకు ముందు నుంచే హై బీపీ ఉన్నట్లు తేలింది. సాధారణంగా తక్కువ ప్రమాదం ఉంటుందని భావించే 60 ఏళ్లలోపు మహిళల్లో కూడా ఇదే ధోరణి కనిపించడం ఆందోళన కలిగించే విషయం.

ఈ నాలుగు ప్రమాద కారకాలను జీవనశైలి మార్పులు, సరైన మందుల వాడకంతో పూర్తిగా నియంత్రించవచ్చని నిపుణులు స్పష్టం చేస్తున్నారు. రక్తపోటు, కొలెస్ట్రాల్, షుగర్ స్థాయిలను క్రమం తప్పకుండా పరీక్షించుకోవడం, పొగాకుకు దూరంగా ఉండటం ద్వారా గుండె జబ్బుల ముప్పును గణనీయంగా తగ్గించుకోవచ్చని సూచిస్తున్నారు. సమస్య తీవ్రం కాకముందే, స్వల్ప స్థాయిలో ఉన్నప్పుడే గుర్తించి జాగ్రత్తలు తీసుకోవడం ఎంతో ముఖ్యమని ఈ అధ్యయనం నొక్కి చెబుతోంది.