ఈ దేశాల్లో బతికున్న కప్పలను పాలలో ఉంచుతారు... కారణం ఇదే!

ఫ్రిజ్‌లు అందుబాటులో లేని రోజుల్లో పాలను తాజాగా ఉంచడం ఒక పెద్ద సవాలుగా ఉండేది. అయితే, రష్యా, ఫిన్లాండ్‌లోని కొన్ని గ్రామీణ ప్రాంతాల ప్రజలు దీనికో విలక్షణమైన, శాస్త్రీయమైన పరిష్కారాన్ని అనుసరించేవారు. పాలు పాడవకుండా ఉండేందుకు వారు ఒక గోధుమ రంగు కప్పను పాల పాత్రలో వేసేవారు. ఇది వినడానికి మూఢనమ్మకంలా అనిపించినా, దీని వెనుక బలమైన శాస్త్రీయ ప్రాతిపదిక ఉందని ఆధునిక పరిశోధనలు నిరూపించాయి.

19, 20వ శతాబ్దాలలో ఈ పద్ధతి విస్తృతంగా అమలులో ఉండేదని చారిత్రక ఆధారాలు స్పష్టం చేస్తున్నాయి. అప్పట్లో ఈ ప్రక్రియ వెనుక ఉన్న శాస్త్రీయ కారణం ప్రజలకు తెలియకపోయినా, ఈ పద్ధతి ద్వారా పాలు ఎక్కువ సమయం తాజాగా ఉండటాన్ని వారు గుర్తించారు. కాగా, ఈ రహస్యాన్ని మాస్కో స్టేట్ యూనివర్సిటీ పరిశోధకులు 2012లో ఛేదించారు. వారు అధ్యయనం ప్రకారం, ఈ ప్రత్యేక జాతి కప్పల చర్మంపై 70కి పైగా శక్తివంతమైన యాంటీ మైక్రోబియల్ పెప్టైడ్లు ఉంటాయి.

పాల పాత్రలో కప్పను వేసినప్పుడు, దాని చర్మం నుండి విడుదలయ్యే ఈ రసాయనాలు పాలను పాడుచేసే బ్యాక్టీరియా, ఫంగస్ వంటి సూక్ష్మజీవుల వ్యాప్తిని సమర్థవంతంగా అడ్డుకుంటాయి. తద్వారా పాలు సహజంగానే ఎక్కువ కాలం నిల్వ ఉంటాయి. ఆశ్చర్యకరమైన విషయం ఏమిటంటే, ఈ కప్పల నుండి లభించే పెప్టైడ్లను వినియోగించి నూతన యాంటీబయాటిక్స్ తయారీ చేసే అంశంపై శాస్త్రవేత్తలు ప్రస్తుతం పరిశోధనలు జరుపుతున్నారు.

అయితే, ప్రస్తుత ఆహార భద్రతా ప్రమాణాల దృష్ట్యా ఈ పద్ధతి ఏమాత్రం సురక్షితం కాదని, దీనిని ఎవరూ అనుసరించవద్దని నిపుణులు హెచ్చరిస్తున్నారు. ఒకప్పుడు కేవలం జానపద నమ్మకంగా భావించిన ఈ సంప్రదాయం, నేడు ఆధునిక విజ్ఞాన శాస్త్రానికి కొత్త మార్గాలను చూపుతుండటం విశేషం.